No.570/2021-2022

Aizawl the 19th May, 2021: Horticulture Department chuan a hnuai ami ang hian Rawmi chungchangah thuchhuah a siam:

Mau/Rua tipung tur chuan a chi emaw tissue culture emaw leh adangte, hman a ngai a. A chi atanga tipung tur chuan mau tâm hun nghah phawt a ngai a ni. Hetiang a nih avang hian Tissue culture chu hautak deuh mahse, a tâm hun nghah kher ngai lova engtik hunah pawh hman theih “technology” awmchhun a ni.

Rawmi (Dendrocalamus sikkimensis) hi Mizoram ramhnuai pilrilah leh hmun zo-ah hmuh tur a awm nual a. Ram dang atanga lakluh ni lovin kan rama tualto ngei nia hriat a ni. Kum 1977–1979 khan Mizoramah a tâm tawh a (Bamboo of India, pp 127). MZU lama kan mithiamte sawi angin kan pi leh pute pawhin tuium, thirdeng pum leh dap, leh adang atante lo hmang tangkaiin, khawvel hmun dangah pawh hmanraw hrang hrang atan hman tangkai a ni. A pum hi a lian thain, a châng a khât tha a, a intiat rual bawk a; industry-ah leh lehkhapuan siamna atan hmantlak a ni tih finfiah a ni tawh bawk (Holstrom 1993).

Thei leh thlai hi chin hunbi nei, a hun taka chin loh chuan hlawhchham theih a ni a, chutiang bawkin Rawmi pawh hi chin hunbi nei a ni. Tun hnaiah Rawmi hi Mizoramah a tâm tih hriat a nih avangin, Mizoram tualto ngei Raw tha hi chin pun a nih a, hman tangkai a nih theih nan Department chuan hma a la a. Department Programme awmsa atangin Rawmi chinna tur hi a zau (cluster) anga buatsaih niin vah fai vek tawh a ni. Chuvangin, kuthnathawktute inruahmanna thlawn lo turin a hun taka raw tiak chintir hi Department chuan tihmakmawhah a ngai a ni.