Vawiin khan Health Minister Pu Lal Thanzara, MFA President ni bawk chuan Phullen Football Ground-ah 8-Chalfilh MLA Invitational Football Tournament a hawng.

Chalfilh bial Football Tournament hawngtu Health Minister Pu Lal Thanzara chuan infiamna khawvela hmasawn turin hriselna a pawimawh tih a sawi a. Infiamna leh hriselna kawnga hmasawn chu tunlai khawvela khua, veng leh ram changkang tehna a ni a ti.

Football leh infiamna chi hrang hranga hmasawnna duhawm tak tak Mizoram in a tawn mek chu sawrkarin thalaite hnena thu a lo tiam - thalaite tana khawvelthar siam a tihpuitlin vang a ni tih a sawi a. Football phei chu tuipui a, buaipui tham, a tui zual leh thiam bikte tan chuan anmahni leh chhungte chawmna atan  eizawnna a ni tawh a ti a. " India ram hmun hrang hrangah Mizo tlangval 300 rual zet in football in ei an zawng tawh a. Heng zinga 50 chuang chu India rama Football League sum tamna ber leh sang ber ber - ISL leh I-Leaque-ah te an khel mek a. Chung zingah chuan kum khat chhunga cheng nuai sawmhnih sawmthum hlawh te. Tin, kum khat chhunga football khela cheng nuai za chuang la lut, kum 30 la tling si lo te pawh kan nei a. State pakhat anga India ram football inelna sangah te player thawhhnem ber kan ni hi hlawhtlinna ropui tak leh inchhuanna tham a ni", a ti. Health Minister Pu Lal Thanzara chuan hrisellohna kawnga Mizoram thangmawi lohna ti reh turin mipui ten, hriselna atana thil tul te kan hriat thar leh a insawizawi te pawh kan uar sawt a ngai tih a sawi a. Infiamna chu hun khawhralna ni lo in hun hman thatna  a nih zawh thu leh ruitheih thil simna atana pawimawh tak pawh a ni tel zawk a ni a ti.

Chalfilh Constituency bialtu MLA Dr Ngurdingliana chuan a bial chhung tana sawrkar  hmalakna hrang hrang sawina hun a hmang a. Hmalakna tam tak zingah bialchhung mipuite tana a lo tiam tawh Zirna, Hriselna leh Inkalpawhna tha siam te chu a tir atanga tun thlenga ngaih pawimawh zual bik a ni a ti. Mizoram leh HPC(D) ten inremna an siam hnuaah phei chuan kawng tinrengah bial mipui ten hma an sawn leh zual a beisei thu a sawi a. Sawrkar hmalakna pawimawh tak tak zingah rikrum thil leh damlo na zualte  hman turin Helipad  pawh Phullen, Khawlian leh Suangpuilawnah te tum tir sawrkarin rem a tih tawh bakah Phullen-ah phei chuan a siam hna thawh mek a ni a ti.

8-Chalfilh MLA Invitational Football Tournament ah hian khaw 22 hnenah sawmna pek niin heng zinga khaw 16 leh a thlengtu, Phullen team 2 ten Trophy hi an inchuh dawn a ni. Organising Committee ruahman dan chuan karleh Thawhleh Ni khian final khelh hman beisei a ni.