Vawiin khan Lawngtlai ICDS Project hnuaia anganwadi worker-te tan Lawngtlai DRO Conference Hall-ah nu leh naute hriselna atana sawrkar laipui ruahmanna Pradhan Mantri Matru Vandana Yojana (PMMVY) chungchang zir hona buatsaih a ni.

He hun hi Lawngtlai District Programme Officer Pi Lalnunthari chuan kaihruaiin, kal khawmte lawmna thu a sawi a. Lawngtlai CDPO Pi Hlawnchii chuan nu nau pai, nau pawm leh naupang tana chaw tha (nutrition) pawimawhzia sawiin, Lawngtlai ICDS Project hnuaia Circle Officer-te pawhin thu an sawi a. District Programme Coordinator F. Lalengvari chuan PMMVY chungchanga hriat tur pawimawh hrang hrang leh Lawngtlai District-a kalpui dan tur te sawiin, a hlawhtlin nana anganwadi worker-te tih tur leh mawhphurhna te a zirtir a ni.

PMMVY hi hmeichhe nau pai leh nau pawmte'n hriselna leh inenkawlna lam an ngaihthah avanga nu leh nausen thihna thleng tam tak tihziaawmna atana ruahman a ni a. Hmeichhe kum 19 tling chin, January ni 1, 2017 hnu lama an fa hmasa ber tur pai tan, hri danna lak ngai zawng zawng la vek, nau pai vanga ham thatna dang dawn tur nei ve lote chuan he scheme hnuaiah hian tanpuina Rs 5,000/- an dawng thei dawn a ni. He scheme hnuaia hmathatna dawng tur chuan anganwadi centre-ah inchhinchhiahtir a, Mother-Child Protection (MCP) Card neih a ngai thung.