Vawiin khan Lok Sabha MP Pu C.L.Ruala chuan Lengpui Venglai Community Hall ah Saansad Adarsh Gram Yojana Phase III hawnna hun a hmang a, Minister Pu John Rotluangliana bialtu MLA ni bawk, Aizawl District Bawrhsap Dr A. Muthamma, sawrkar department hotu hrang hrang leh Lengpui khawtlang hruaituten an telpui.

Lok Sabha MP Pu C.L.Ruala chuan Lengpui khua chu Mizoram kawtchhuahpui a ni a, ram pawn atanga zin veivakte hmuh hmasak ber tur chu Lengpui hi a nih avangin kawng engkima entawntlak a kan siam a ngai a, hemi avang hian Model Village atan ka thlang a ni, a ti a. Model Village in a tum anga khaw fai leh hrisel, kawng hrang hranga intodelh khua leh khaw dangte tana entawntlak a awm tur chuan a mipuite hi kan pawimawh ber a ni, a ti.

Minister Pu John Rotluangliana chuan Lengpui khua Model Village a siam tura an thlang chu lawmawm a ti a, Lengpui khua chu kawtchhuahpui anih angin zin miten Mizoram an hriatreng dan tur chu Lengpui khawtlang mipuite kutah a in nghat thui hle, a ti a. Pu John Rotluangliana chuan zin mite hip thei tur chuan rilru zau tak put a ngaih thu a sawi a, tun hnaia ramdang infiam mi in Mizoramah kut a tuar chu zahthlak a tih thu leh pawi a tih thu a sawi a, hetiang thil hi thleng leh tawh lo tura a duh thu a sawi bawk. Lengpui khua chu kawng engkima entawntlak ni turin leh khaw mipui inlungrual tak ni turin a chah a, Model Village hlawhtling taka kalpui a nih theih na turin duhsakna a hlan bawk.

Lengpui SAGY Village hawnna hun hi Pu Lalhriatpuia, Director R.D department in a kaihruaia, Dr Lalhruaitluangi Sailo, Core Faculty SIRD & PR hnen atangin SAGY tobul leh kalpui a nih dan te kimchang takin ngaihthlak a ni a, Pu Andy Lalfakzuala Varte, BDO Tlangnuam in Fundamental Rights & Duties chhiar chhuahna hun hmangin Aizawl DC in thusawina hun a hmang bawk.