1701/2025-2026

Date Aizawl, October 2, 2025: Vawiin khan Hmar Students' Association (HSA) Joint Headquarters, Aizawl buatsaihin Art & Culture Auditorium, Berawtlang, Zemabawkah HSA Day vawi 87-na lawmna leh Freshers' Social hun hman a ni a, Mizoram Assembly Speaker Lalbiakzama'n khuallian niin a hmanpui a, Lalringdika, IPS, Commandant, 3rd Battalion MAP chu khualzahawm niin zohnahthlak zirlai pawl hrang hrang, MZP, MSU, Mara Students' Organization, Lai Students' Association, Pang Zirlai Pawl, Siamsin Pawl Pi, Mizoram Bawm Students' Association Ranglong Students' Union te an tel bawk a ni.

Khuallian chuan zirlaite leh hruaitute fuihna thu sawiin rilru puitling tak pu turin a chah a. Mizo hnahthlak hmar hnamte chanchin sawiin, hmanlai Mizo khuaa Pasalţha leh tlawmngai falte'n, ral laka khaw venghim tura, daifemahte In leh lo an din ţhin ang maia, zofate ram delh china daidotute chu Hmar hnamte hi an ni a ti a. Zofate kulh bang, kan hnam ralvengtute an ni tiin, anni hi awm lo ta sela chuan, zofate ram luah chin hi, tun aia a zim tur thu a sawi bawk. HSA-te chu Mizo culture tihausatu an nih inhre reng tur leh inpumkhat leh inlungrual taka ke pen puiah a sawm a bawk a ni.

Vawiin hun hmannaah hian Hmar mite zinga eizawnna leh zirna kawnga mi hlawhtlingte chawimawina hun hman nghal niin tun hnaia Mizo ten Indian Police Service (IPS) kan neih tharte zinga pahnih - Lalringdika, 3rd Battalion MAP Commandant leh J. Lalthafamkima, Director, ACB te bakah ICFAI University Vice Chancellor Dr. Ginlianlal Buhril te, MBBS zo mi panga - Lalduhawmi, Nancy K Lallawmzeli, Lalnunthari, Roneikim, leh Vanlalhruaitluanga te, B.Sc Environmenral Science 2nd Rank Holder Lalmalsawma; LLB zo pahnih - Rejoy Lalnunpuia leh Lalnunsiami te bakah B.ed zo Lalhmangaihzuala leh MMA Fighter Nazareth Lalthazuol te chawimawina hlan an ni.

Hmar Students' Association (HSA) hi October 3, 1939 khan Imphal, Manipur-ah din ṭan a ni a, Mizoram-ah chuan, July 13, 1986 khan din a ni a; Mizoramah Joint Headquarters pathum - Aizawl, Kolasib leh Sinlung Hills ahte a awm a, India khawpui lian hrang hrangah Branch 6 awmin, Join Headquarters hnuaiah hian unit 100 chuang a awm mek a ni.