1702/2025-2026

Thenzawl, the 2nd October 2025: Vawiin khan Chief Minister Pu Lalduhoma chuan a bial Thenzawl Vengthlang Branch YMA kum 25 na (Silver Jubilee) lawmna, Victoria English School-a buatsaih chu khuallian niin a hmanpui.

Thu sawiin Chief Minister chuan, Thenzawl Vengthlang YMA member leh khawtlang mipuite Jubilee chibai a buk a. Branch lo kaihruai tawhtute fakin vawiina hruaitute pawhin kum tam tak lo la kal leh tur tana hmathlir thui tak nei chunga kaihruai turin a chah.

Kan ramah Missionary an lo luh khan rinna thar an rawn keng a ni satliah lova. Biak in leh inkhawm te, nitin sikulte an rawn kenglut tel a. Kristian an pung deuh deuh va. Zirna kan ngaihlu tial tial bawk a, Zawlbuk kha a rawn hliahkhuh tan ta a ni. Kum 1925 a lo her chhuah meuh chuan mumal taka Zawlbuk kalpui thei khua an awm bar tawh lo. Zawlbuk ber a awm tak lovah chuan Missionary te khan Zawlbuk pawimawhna chhawm nung zel thei institution din tulin an hria a. Kum 1935 June thla tirah Pi Zaii inah inrawnkhawmna an nei a, June ni 15 ah Young Lushai Association an din ta a. Zawlbuka thalai riahkhawmtir lam kalsanin, mahni ina riaka mahni pawipang khawih chunga, pawl (Association) kaltlanga hmalakna a lo piang ta a ni.

YMA hian Zawlbuk thatna leh tangkaina kha a chhawm a, kristianna pensan lovin Zonun ze mawi vawnhim leh thangtharte hnena hlan chhawn hna te, hnamzia leh culture venhim te, thu leh hla, lam, rimawi leh hmunhma hlui vawnhim te a kalpui a, vawiina mite pawhin chu chu kan phak tawka kan kalpui ve zel a tul a ni. Thenzawl Vengthlang branch pawh hi hemi kawngah hian Meichher chhi engtu rawn ni thar ula, a ropui ngawt ang. Tin, ‘YMA chu tanpui ngaite tanpuitu a ni’, tih hi Mizo mipuite thinlungah a cham reng a. Tunlai khawtlang nunah hian thangtharte hian tanpui ngaite hnuchhawn a, kan hmaizah zawngte lam chauh kan bengkhawn mai ang tih te a hlauhawm tawh a ni. YMA hi chuan hmeithai leh fahrah te, chhuanchhamte lam hi i hawi tlat ang u, a ti.

Thenzawl Peace City din tum a chak taka hmalak mek a ni a, hei hian nasa takin kan khaw hmelhmang a rawn thlak dawn a. Mipuite inhawng taka kan inbuatsaih a ngai dawn tih i hre lawk ang u, tiin a chah bawk.

Vengthlang branch hi kum 2000 a din a ni a, a hma chuan Bazar Branch hnuai a section pakhat a ni thin. Tunah hian branch chhungah in ding 302 awmin an zinga 290 hi luah lai an ni a, mihring hi 1450 an cheng mek a, an zinga 780 hi hmeichhia an ni. YMA member hi 925 an awm mek.

Thenzawl hi Lal hmingthang Bengkhuaia'n kum 1863 kuma a din a ni a, aman a thut loh lai pawhin a faten an thut zui zel a. Lal hnuhnung ber chu a tupa Lalngurchhina a ni. Lal Bengkhuai hi Thenzawl Bungmuala a chenna in ah kum 1879 khan a thi a, a thlan pawh a in bul mai ah hian a awm.

Silver Jubilee lawmna inkhawm hi Pu Henry Lalthanpuia, President chuan a kaihruai a, Pu R. Ramhmuakliana'n hunserh a hmang a, Pu Joseph MS Tluanga'n report a pe a ni. Inkhawmah hian an Branch OB lo ni tawh zawng zawngte chawimawina leh an branch huam chhunga mi infiamna lama mi hmingthate chawimawina an nei a ni.