Vawiin khan Lal Thanhawla Auditorium, Aizawlah kum 2018 HSLC leh HSSLC result tihchhuah taka topper-te hnenah Chief Minister's Award hlan a ni a. Chief Minister Pu Lal Thanhawla chu khuallian niin School Education Minister Pu H. Rohluna  chu khual zahawm a ni.

Chief Minister chuan zirlai tithate chu a lawmpui thu sawiin, kumin HSLC leh HSSLC exam result chu kum dang ai zawnga a that avangin zirlaite, zirtirtute, Education Department a thawkte leh zirlai tawiawmtu an chhungte chungah lawmthu a sawi a. Chutihrual chuan tun a hlawhtlinnaah hian duhtawk mai lo a, result tha chu vawn chhoh zel piah lamah hmasawn zelna tur rahbi ah hman tur a nih thu sawiin, Chief Minister chuan exam la awm zel turah topper ten mark sang zawk an hmuh zel a duh thu a sawi a ni. Zirna lama hmasawnna chuan ram hmasawnna a thlen thu sawiin, hemi kawngah hian sawrkar pawhin nasa taka hma a la a ni, a ti a. Chief Minister chuan ram dang el pha ‘export-quality education’ siam tura kawng hrang hranga hma lak a nih thu sawiin, zirna siamtha tura education lama India mithiam ber berte telna Education Reforms Committee lo din a nih tawh thu te, Science and Technology lama hmasawnna chu thui taka ram hmasawnna innghahna a nih avanga science leh mathematics lama zirna tha zawk nei tura hmalak a nih thu te a tarlang a. Eizawnna tha leh hlawk an neih theih nan thalaite tan NEDP kaltlanga India rama management lam zirna in tha berte zing ami, IIM-Calcutta Innovation Park nen thawk hova Entrepreneurship Development Scheme kalpui a nih thu te, Mizoram Youth Commission kaltlanga Skill Development atan hmalak a nih thu te a sawi. Sawrkar hmalakna zawng zawngte hi hlawhtling tur chuan zirlaite leh an nu leh pa te tawimawmna a pawimawh thu sawiin, tanrual puiah kalkhawmte chu Chief Minister hian a sawm a ni.

Chief Minister chuan zirlaite chu nu leh pa thu awih a, chhunglam leh pawnlam nun uluk a, aia upate leh zirtirtute zah thiam tura fuihin, chutiang taka an nun chuan ram leh hnam innghahna tlak dik tak annih tur thu a sawi a. Tum ruh a tul thu sawiin, tum tih san chuan tlakna pawh a sang tih vawng reng chungin, rilru tipaukhauh a, tum mumal tak nei a hriat chian bakah, inpuahchahna tha tak nen hma la zel turin zirlai kalkhawmte chu a chah a. Zirtirtute pawh zirlaite entawntlaka invawng leh fimkhur taka nung turin a chah bawk a. Zirna lama thahnem kan ngaih tak tak chuan ram leh hnam in hma a sawn phah in, ram leh hnam humhalhna kawng a ni, a ti.

Khualzahawm School Education Minister Pu H. Rohluna chuan zirlai tithate chu chawimawi an phu avangin leh an zirlai puite tan chona a nih theih nan Chief Minister’s Award chu sem thin a nih thu sawiin, kumdang zawng aia kumin chu pass percentage a that ber tum a ni chu lawmawm a tih thu a sawi bawk a. Kum 2015-a selection test neih thin chu naupangte tan an future career tichhetu a nih theih dawn avang leh school tihmingthat tumna chauh a nih avanga tih tawp a nih hnu khan result a chia tphah rinawm viau amh se pass percentage a that phah zel zawk thu a sawi a. Zirtirtuten inthlahdah lova thahnemngai taka an zirtir thin zia a lang chiang hle a ni, a ti. Result felfai taka tichhuaktu MBSE a thawktute thawhrimna fakawm a ti a. Topper-te mark percentage in san lam a pan zel chuan zirna quality pawh a san phah tih a lan thu a sawi. School Education Minister chuan zirna in hma a sawn theih nan Mathematics leh Science zirtirtu thar sawrkarin 107 a lak thu leh, a decline tute hmun awl pawh panel list atanga hnawhkhah a nih vek tawh thu a sawi a. Heng bakah hian teaching aid atan video clip siam a, sawrkar school hrang hranga zirlaiten a thlawna an hman tangkai tura thawnchhuah a nih thu te, sawrkar Higher Secondary School, science zirna la awmlohna hmuna science stream hawng tura hmalak mek a nih thu leh, Infrastructure lamah nasa takin hma sawn tawh chu chhunzawm zel tura hmalak mek zel a nih thu te a tarlang a ni.

Chawimawina dawngtute hi HSLC Topper pahnih, Lalremsiama Darchhun s/o Vanlalpeka, Tanhril, Aizawl, St. Paul’s HSS leh Royal Philem s/o Philem Opendro Singh, Selesih Vety College Campus, Mount Carmel School, Aizawl ami te anni a. HSSLC-ah hian stream pali a topper theuhte chawimawina pek niin, Arts ah C.Vanlalremruati d/o C. Sangthanga, Lunglei Chanmari, Home Mission School; Commerce-ah K.Lalthansanga s/o K. Lalromawia, Lawngtlai, St. Jospeh HSS, Aizawl; Science-ah Angela Vanlalhmangaihi d/o Lalneihthanga Colney, Tlangnuam,Aizawl, St. Paul’s HSS leh Nafisa Barlaskar d/o Abdul Hadi Barlaskar, Kulikawn, Aizawl, St. Paul’s HSS; leh Vocational Stream ah Lalhriatkimi d/o H. Lalchhandama, Khatla, Aizawl, Govt. Mamawii HSS te an ni.

Kum 2013 atang khan HSLC leh HSSLC topper-te hnena Chief Minister’s Award hi hlan tan a ni tawh a. Kum 2016-ah scheme mumal zawka siamin Mizoram Chief Minister's Award to Toppers of HSLC & HSSLC Examination under MBSE Scheme tia vuahin November 8, 2016 ah notification tihchhuah a ni. Award hian citation leh pawisafai cheng 50,000 zel a keng tel a ni. 

Award hlanna inkhawm hi School Education Commissioner & Secretary Pi Esther Lal Ruatkimi, IRS chuan a kaihruai a. School Education Director Pu K. Lalthawmmawia IAS chuan lawmthu sawiin hun a khar a ni.