No.3370/2020-2020

Aizawl the 23rd July, 2020: Department of School Education buatsaihin kumin 2020 HSLC (High School Leaving Certificate) leh HSSLC (Higher Secondary School Leaving Certificate) exam a topper te hnenah vawiin khan School Education Department Conference Hall-ah Chief Minister's Award hlanna hun buatsaih a ni a. Chief Minister Pu Zoramthanga chuan HSLC topper mi pathum te leh HSSLC topper mi pali te hnenah Citation leh pawisafai Rs. 50,000 theuh a hlan a ni.

Chief Minister chuan HSLC leh HSSLC topper-te chu a lawmpui thu hrilh in, an taimakna rah an hmu ngei a ni a ti a. Mihring nunah, a bik takin zirlai te zingah mihring taimakna leh tumruhna hian thil a tih theihzia hi hriat thar pawimawh a tih thu a sawi a. Chief Minister chuan mihring rilru/ ngaihtuahna leh tha hian kan beisei leh hriatthiam phak bakin thil a ti thei a; thei nia kan inhriat tlat chuan hlawhtlinna kan chang thei thin a ni, tiin zirlaite chu taimak thlah lo turin leh tumah beidawng lovin na kalna zel turah theihtawp chhuah zel turin a chah a. Chief Minister chuan mahni talent theuh hmang tangkai zel turin zirlai te a chah a. An beisei anga hlawhtlinna changlo te pawh beidawng mai lovin, theihtawp chhuah zui zel turin a chah a ni.

Zirlai tithate chawimawina inkhawm tawiah hian School Education Minister Pu Lalchhandama Ralte chuan hrileng avangin kum dang angin a lawmna huaihawt theih nilo mahse topper chhuanawm tak tak, chawimawi phu tak takte tana hun tawi te tal hman a ni thei chu lawmawm a tih thu a sawi a. hlawhtlinna changtute chu lawmpui thu leh an kal zelna tura hlawhtlinna an chan chhunzawm zel a duhsak thu a sawi a ni.

Award dawngtute chu hengte hi an ni:

HSLC toppers-

(a) Lalhlimpuii, d/o C. Vanlalsiama, Khatla, Aizawl, St. Paul's HSS

(b) Simon Lalremsiama Shangpliang, s/o Kyrshanbor Shangpliang, Ramhlun North, Aizawl, St. Paul's HSS

(c) Singokhai Chozah, d/o C. Thahe, Chaltlang, Aizawl, St. Paul's HSS

HSSLC toppers-

(Arts)

(a) Christina Lalchhandami, d/o Lalrawna, Tlangnuam, Aizawl, Greenland HSS

(b) Lalhlimpuii, d/o Vanlallura, Darlawn, St. Joseph HSS

(Commerce)

(c) Lalhriatpuia Ralte, s/o Lalthanpuia, Lunglei, St. Joseph HSS

(Science)

(d) Lalremsiama Darchhun, s/o Vanlalpeka, Tanhril Venglai, Aizawl, St. Paul's HSS

Kumin hian HSLC exam candidate zirlai 18,036 awmin 12,393 in hlawhtlinna an chang a, HSSLC exam ah zirlai 12,324 ziakin 9,677 in hlawhtlinna an chang a ni. Vawiin topper te chawimawina inkhawm tawiah hian School Education Commissioner & Secretary Pi Esther Lal Ruatkimi chuan thu sawi bawkin, Director Pu James Lalrinchhana chuan lawmthu sawiin hun a khar a ni.