Kumin Higher Secondary School Leaving Certificate (HSSLC) Examination 2018-a Arts, Science, Commerce leh Vocational stream-a Mizo Zirlai ti tha pathum theuhte lawmpuina vawiin khan Mizo Students' Union (MSU) buatsaihin neih a ni. Zirlai tithate lawmpuina inkhawmah hian Chief Minister Pu Lal Thanhawla chu khuallian niin, Home Minister Pu R. Lalzirliana chu khualzahawm a ni.

Chief Minister chuan MSU in kum tin zirlai tithate chawimawina hun a siam thin chu lawmawm a tih thu sawiin, chawimawi tlakte chawimawi a, lawmte lawmpui nachang hriat chu thil tih tur awm reng leh changkanna in a ken tel pakhat a ni, a ti a. Kumin HSLC leh HSSLC result chu kum hmasa lam zawng aia pass percentage a that avanga lawmawm a tih thu sawiin, zirlaite taihmakna leh zirtirtute tan lakna chungah lawmthu a sawi a. "Hmasawnna ropui tak a nih rualin a aia pass percentage sang zawk Mizoramin a neih a, mark percentage sang lehzual kan neih theih nan tan i la chhunzawm zel ang u", tiin zirlaite leh zirtirtute a sawm a ni. Khuallian chuan zirlai kalkhawmte chu nakin lawk a ram nghahfak annih thu sawiin, chutihrual chuan ram innghahna ni thei tur chuan an zirnaah theihtawp chhuahin, nu leh pa chawimawi, aia upate zah thiam leh nun uluk a pawimawh zia a sawi a. Chief Minister chuan Kristian kan nihna angin rilru, taksa leh thinlung thianghlim nei tura invawng tur kan ni, tiin insumtheihna neih a pawimawh thu a sawi a. Zirna kawnga hmasawnna nei turin zirtirtute an pawimawh thu sawi bawkin, zirlaite tan role model annih hre renga inbuatsaih thin turin a chah bawk.

Chief Minister chuan hna zawn pawhin ram chhungah ngei awm tum a tam zawk an ni zel chuan Mizoram chu ram nuam leh zalen a nih zia tichiangtu a nih thu sawiin, chutihrual chuan Mizoram chhungah chauh hnathawh tum chuan ram tana kan tangkai lehzual theihna laka min phuartu a nih theih thu a sawi a. Khawi hmunah pawh awm hrehlo leh tlangnel tum tura chahin, chutiang tur chuan tawng thiam a pawimawh in, state pawna invawrhsang tur chuan English leh Hindi thiam a tul thu a sawi a. "Kan tih ve theih reng, kan tum ve loh avanga sawrkara post pawimawha Mizo an awmloh mai a hlauhawm," a ti a ni. Mizoram economy in hma sawn zelin, Per Capita Income-ah National Average aiin Mizoram a san thu te, Least Malnourished State a puan a nih thu te, GSDP tha ber pawl state a nihna leh state tê 12 te tehna hrang hranga khaikhin an nih hnu a a ber dinhmun a nihna te chu thil lawmawm tak a nih thu a sawi a. Hengte hi sorkar hnathawkte leh mipui zawng zawng thawh rah tling khawm atanga hetiang dinhmun thleng thei kan nih avangin duhtawk mai lova hmasawn zel tura min ti tangtu tur a ni, a ti bawk.

Khualzahawm Home Minister chuan MSU chu an dinchhan zirna anih angin zirlaite hmakhua chu hna pui berah nei se a duh thu sawiin, lawmpuina dawng thei khawp a mahni hnaa rinawm zirlai titha vawiin chawimawina hun an buatsaih chu lawmawm a tih thu a sawi a. Hlawhtlinna hmu turin pumpelh a awm theihloh thu sawiin, awlsam taka hlawhtlinna dawng tum te chu tluang pur angin ngaih theihin awm thin mahse a tluantling thei ngailo a ni, a ti a. Mahni thawhrimna leh taihmakna avanga hlawhtlinna chan chu a nuam in, sum leh pai pawh mahni thawhrimna rah hman chu a tlo zawk thu a sawi bawk. Home Minister chuan vawiina zirlai chawimawi ten hlawhtlinna chhuanawm tak an hmuh chu khawvel hlawtlinna kawng an zawh tur atana rahbi hmasaah ngai tura chah in, hmachhawn tur tam tak an la tawn chhoh tur thu a hrilh a. Duhthlanna dik neih a pawimawh thu sawiin, chumi atan chuan mahni inhriatchian leh mahni tui zawng leh duh zawng te hriat a pawimawh thu a sawi a. Hun a hlut avangin duhthlanna siam fel tawh tan chuan harsatna karah beidawnglo in ti hram hram turin leh, huphurh neih tam lutuk te hi hlawhchhamna thlentu a nih theih thu a sawi bawk. Minister Pu R. Lalzirliana chuan harsatna hrang hrang an la tawn chhoh turah harsatna pumpelh tum lovin, paltlang zo tura tumruhna leh huaisenna nei zawk turin zirlai kalkhawmte chu an rilru siam turin a chah a, eng kawngah pawh taima leh thawkrim taka thawh chuan hlawhtlinna an hmuh tur thu sawiin, an zirna leh an nun tichhe theitu zu leh ruihhlo laka fihlim turin a chah bawk.

Zirlai titha lawmpuina hlante hi a vaiin mi 12 an ni a. Arts Stream atangin (i) C. Vanlalremruati d/o C. Sangthanga, Home Mission School, Aizawl, (ii) Jammy Vanhmingliana s/o R. Vanlawmkima, Oikos Hr. Sec. School, Aizawl (iii) Lalpianpuii d/o Sangkunga, Synod Hr. Sec. School, Aizawl; Science Stream atangin (i) Angela Vanlalhmangaihi d/o Lalneihthanga Colney, (ii) Ruth Lalrinawmi d/o Vanlalhriata , (iii) K. Lalrinpuii d/o Lalrochhuanga te niin, an vai hian St. Paul's Hr. Sec. School, Aizawl atanga pass an ni. Commerce Stream atangin (i) K. Lalthansanga s/o K. Lalromawia, St. Joseph Hr. Sec. School, Aizawl (ii) Phillip Lalremtluanga s/o Zoliansanga, St. Paul's Hr. Sec. School, Aizawl, (iii) H. Lalrohlua s/o Lalengzauva, Oikos Hr. Sec. School, Aizawl; leh Vocational Stream atangin (i) Lalhriatkimi d/o H. Lalchhandama (Commerce Garment Designing & Making), Govt. Mamawii Hr. Sec. School, Aizawl, (ii) R. Laltlanmawii d/o R. Lalrinawma (Sericulture), Govt. Saitual Hr. Sec. School, Saitual (iii) C. Lalhundika s/o Peter Rothazuala (Sericulture), Govt. Zemabawk Hr. Sec. School, Aizawl te an ni a. Citation leh pawisafai bakah lehkhabu pek theuh an ni. Zirlaite bakah hian stream tin a top 3 zirlai nei school pakua (9) hnenah lawmpuina hlan a ni bawk. Kumin HSSLC Exam-ah hian zirlai exam 11,802 zingah 9,500 pass in, pass percentage chu 80.49% a ni a. Nikum 2017 khan HSSLC pass percentage chu 74.36% a ni.

Vawiin MSU Gen. Hqrs-in Mizo zirlai tithate lawmpuina inkhawm a buatsaihah hian Career Awareness neih tel a ni bawk a: Pu Lalhruaitluanga, Managing Director, ZoCareer Solution leh Pu Joseph L. Ralte, Expert Member, MEDMOC atangin thusawi ngaihthlak a ni a. MSU chuan vawiin programme ah hian Chief Minister chu zirlaiten state tour & excursion an neih theih nana kumin State Budget a sum dah a nih avangin leh, Home Minister chu HPC(D) te nen inremna thuthlung Mizoram Sawrkarin a ziah avangin chawimawna an hlan bawk a ni.

Programme hi MSU Gen. Hqrs. Vice President Pu Benjamin Lalnghaka Fanai chuan kaihruaiin, Pu Lalthanzuala, General Secretary hnen atangin report ngaihthlak a ni a; MSU President Pu RB Lalmalsawma hnen atangin thusawi ngaihthlak ni bawkin, Pu T. Ngenkhansut, Treasurer chuan lawmthu sawiin hun a khar a ni.