State Bank of India, Regional Business Office, Aizawl in HSSLC Exam 2013-a Arts, Science leh Commerce subject-a Toppers (pakhatna atanga pathum nate) te lawmpuina leh chawimawina programme vawiina Engineers’ Club Babutlang-a an buatsaih chu Pu Lal Thanzara, Parliamentary Secretary to Chief Minister leh a nupui Pi Zohmingthangi ten an hmanpui.
Pu Lal Thanzara chuan SBI-in zirlai titha leh lawmpuina programme an buatsaih chu lawmawm tiin kawng hrang hranga tanpui ngaite, a bikin zirna in leh pianphunga rualbanlote tana ‘Corporate Social Responsibility’ kaltanga an tanpuinate chu mite tan malsawmna anih thu a sawi a. Zirlai titha te chu a lawmpui thu hrihlin hmathlir thui taka neia, an zir zelna kawng tur thlang turin leh an thiante leh mite thil tih hnungzui lova, mahni ngaituahna hmanga hma la turin a ngen.
Pu Lal Thanzara chuan IAS leh IPS ah te Mizo kan tlem tak vangin leh hun lokal zel turah ram leilung fate ngeiin Sawrkar inrelbawlna kawngah dinhmun pawimawh tak tak te an chelh theih nan UPSC Exam te tinzawna an rilru leh ngaihtuahna seng turin a fuih a. Zirlai titha zingah Facebook account leh mobile neilo an awm chu an entawntlak hle a a hriat thusawiin hengte thil tul lo tih nan zirlai ten an hmang thin avangin zirlai te tan chuan hengte hi neih rih loh a hlawkthlak zawk nia a rin thu a sawi. Zirlai ten hlawhtlinna an hmuh chan chu an thawhrimna leh an taimakna avangte anih rualin nu leh pate inpekna leh zirturtu thahnemngaihna chu fakawm a ti bawk a.
Zirlai te tan tum mumal neih a pawimawh thu sawiin tum mumal neih loh chuan hlawhtlin a har a ni, a ti. Pu Lal Thanzara hian Topper 9 te hi thuziak leh SBI passbook a hlan a. Lawmman pakhatna in cheng 10,000, pahnihna in cheng 7,500 leh pathumna in cheng 5,000 a keng tel a. He sum hi zirlai te Savings Bank account-ah an thun saka, account neilo te tan account thar an hawnsak bawk a ni.
He programme hi Pu Lalthuamliana, Assistant General Manager chuan a kaihruaiin, Pu H. Lalhlimpuia, Deputy Manager chuan lawmthu sawiin hun a khar thung a ni. He hunah hian St. Paul’s HSS leh Mizo HSS Principal te pawhin thu an sawi a ni.
