Vawiin khan Higher & Technical Education Minister Dr R. Lalthangliana chuan hrilh lawk lovin Aizawl khawpui chhunga College 4 : Govt J Thankima College, Govt Aizawl North College, Govt Hrangbana College leh Government Aizawl College te a tlawh a. He mi hma hian Durtlang Leitan Vengah Govt Zirtiri Science College building sak mek leh a hmunhma siam rem ngai lai te a en tawh bawk a ni.

Vawina Aizawl khawpui chhunga College pali a tlawhnaah hian,  Higher & Technical Education Minister Dr R.Lalthangliana chuan College building chhungah class room, IQAC, NCC Room, hmunhma buatsaih leh sak lai mek te a en kual deuh bik a ni. Zirtirtute awmna pindan intawm, Class Room leh hmun pawimawh dang a hmuh duh lai te a fang kual a.   College thenkhata zirlaite tawt lutuk leh class room pakhata inhnawh tam lutukna  hmuna sawi te leh College  building him lo lai nia ngaih te pawh a endik nghal a. Heng hunah te hian zirtirtute leh Principal te hnenah an harsatna bakah an college dinhmun tlangpui te a sawipui bawk a ni.

Vawiina H&TE  Minister Dr R. Lalthangliana'n a tlawh college panga te dinhmun tawi:  Government Zirtiri Science College(GZSC) - Durtlang Leitan Campus-ah an la insuan lut thei rih lova.  Campus thara GZSC hmuhmaah hian College Building Block -I, Library, mi 37 awm theih ve vena Mipa Hostel building leh Hmeichhe Hostel Building leh  Laboratory Building a awm tawh a. College Building Block-II, Parking Lot, Administrative Building leh approach road siam that a la ngai a ni. Tun dinhmunah Science Subject la bik zirna a nih angin zirlai 635 te chu Old Campus, Ramthar Vengah zirtirtute nen an la awm mek a ni.

Government J Thankima College, Bawngkawn Bigade Vengah hian Zirlai 590 an lut meka. Arts Zirna  bakah Bachelor of Science(BSc) leh Bachelor of Business Administration(BBA) zir theihna hmun a ni. Science bik zirna hi Building sak mek a nih angin tan a la ni lova, BBA  zirna chu, a senso intum chawpin, Mizoram University hnuaiah leh pawmpuina ang thlapin nikum atang khan kalpui a ni tawh a ni.

Government Aizawl North College, Ramhlun North Vengah hian zirlai 1280 an lut mek a. Hei hi  a hmun hma chep zia ngaih tuahin a tam mah maha, College Class room atan a bula Trade & Commerce Building an hmang hawh chung pawhin an la thawl lo hle a.  Zirlai an tam zia ngaihtuah pawhin zirtirtu an nei tam lo hle a; tun dinhmunah zirtirtu - anghet 27 leh a nghet lo 8 an nei mek a ni.

Government Hrangbana College,  Chanmari-ah hian Arts leh Commerce zirna a awm kawp a, tun dinhmunah Zirlai 1810 leh zirtirtu : Professor puitling 2, Asso Professor 41, Assistant Professor 10 leh a nghet lova thawk 13 an awm mek a ni.

Government Aizawl College, Sikulpuikawn-ah hian zirlai 1280 leh zirtirtu 62 an awm mek a. He college building hi AMC in Aizawl khawpui chhunga building him leh him loh zirchian zinga mi a ni.