Vawiin hian DC Conference Hall Serchhipah Special Summary Revision of Photo Electoral Rolls 2020 neih tur inbuatsaih nan District chhunga Booth Level Officer (BLO) ten training an nei.

He hunah hian Pu Vanlalhmachhuana, Election Officer Serchhip chuan zirtirna a pe a. Tuna BLO te hi kum 2006 atanga ruat tan an ni a. Electoral Roll fel fai leh tha kan neih theih nana a tak taka thawktute an ni. Loh theih lohna avangin BLO za zela 97 vel chu zirtirtu an ni a, anni bak hi thingtlangah sawrkar mi leh sa awm an awm loh vang anih deuh ber thu sawiin, an chungchangah District Election Officer in thuneihna thui tak a neih thu a sawi a ni.

Election Commission of India thuchhuah angin vawiin August 16 (Zirtawpni) atanga September 30 (Thawhtanni) 2019 chhung hian Electoral Roll dik leh fel fai a awm theih nana hmalakna thar Electoral Verification Programme (EVP) kalpui tan a ni a, he programme hnuaiah hian elector ten Roll a an hming leh an chhungkaw hmingte internet atangin an endik theia, diklo leh siam that ngai dilna an thlen nghal thei a. Chung an dilnate finfiah hna leh a tul anga document lo umzui chu BLO te mawhphurhna niin, BLO te hian an bial chhung in tin tlawh chhuakin, geo tagging te pawh tih vek tur a ni dawn a. Chung atana an hriat tur thil pawimawh hrang hrangte chu vawiin hian zirtir an ni. Tin, Special Summary Revision 2020 pawh neih zui nghal tur a ni bawk a, ni 1.1.2020 a kum 18 tling tharte Electoral Roll a thun tur a ni a, ni 15.10.2019 atanga ni 30.11.2019 thlengin dilna thehluh theih niin, ni 1.1.2020 atanga ni 15.1.2020 inkar chhung hian Final Roll publish a ni dawn a, chumi atana an mawhphurhna te pawh a thara zirtir nawn leh an ni.

Serchhip District chhungah hian Booth Level Officer (BLO) 77 an awm a, training ah hian an kal tha hle a ni.