Vawiin khan Urban Development & Poverty Alleviation Department buatsaih Mizoram Khawpui Fai Intihsiakna 2019 chu Deputy Chief Minister Pu Tawnluia’n a chenna in Chawnpui Venga programme buatsaihah a hawng.

Pu Tawnluia chuan khawpui fai inelna hi fai inzirtirna (awareness) atan a pawimawh a, a hlawhtlinna tak tak chu mipuiteah a innghat a ni, a ti. Thatho leh phur taka tan la tura sawmin Deputy Chief Minister chuan kum danga inelna an lo buatsaih tawh zawng zawng aia hmasawn zawk leh titha zawk turin mipuite a fuih a. Inelna buatsaih hian mi thinlung a kaitho a, faina kawngah rilru a chawk phura, sum leh pai dawn tur lam ai mahin mite thinlunga fai leh thianghlim a pawimawhzia inzirtirnan a tangkai avanga inelna buatsaih thin a ni, Deputy Chief Minister chuan a ti.

UD&PA Secretary Dr.C.Vanlalramsanga chuan intihsiak buatsaih a nih chhan sawiin inelna buatsaih a nih hian khawpui tinin faina lamah nasa takin tan an lak phah a, thil thar leh entawntlak (best practices) an zawng a, khawdang tih ngai loh thil thar ching chhuak turin ngaihtuahna an seng a, mahni khua chauh nilo khaw hrang hrangin faina a hma an lak dan te inhre pawhin thawhhona tha leh tanrualna a siam a ni, a ti. State dangte chin ve hma hauhin Mizoram chuan kum 1977 atang khan Mahatma Gandhi piancham pualin faina hapta a lo buatsaih tan tawh tiin fai inzirtirna kawngah Mizoram chu hmahruaitute zinga mi a ni, a ti bawk.

UD&PA Department hmalaknain Mizoram Sanitation Task Force hnuaiah Mizoram Khawpui Fai Intihsiakna hi Urban Town 23 ah neih a ni leh dawn ta a. He inelna hi kum 2017 atang khan kum tin buatsaih thin a ni. Mizorama khawpui 23 te chu Category I leh II ah then a ni a. Category I ah hian District headquarters - Aizawl, Lunglei, Siaha, Champhai, Kolasib, Serchhip, Lawngtlai leh Mamit te dah niin District thar pathum headquarters te erawh dah tel an la ni rih lo. Category-II ah Saitual, Khawzawl, Hnahthial, Vairengte, Tlabung, Kawnpui, Thenzawl, N.Vanlaiphai, Darlawn, Zawlnuam, Biate, Khawhai, Sairang, Lengpui leh Bairabi te dah an ni. Category I leh II bakah hian a pumpuia khaw fai ber ‘Overall Cleanest Town’ lawmman a bik taka siam a ni bawk.

Cleanliness Competition 2019 inkaihhruaina bu leh kalpui dan tur mumal taka siam a ni a. He Guideline hi Mizoram Deputy Chief Minister leh UD&PA changtu ni bawk Pu Tawnluia chuan vawiin programme-ah hian a tlangzarh nghal a ni. He Guideline-ah hian tih tur ruahmanna leh endikna tehfungte felfai taka tarlan a ni a. Kumin intihsiaknaah hian khaw tinah zirna in, sawrkar pisa, damdawi in leh hotel-te endik a ni dawn a, rank pek an ni bawk ang.

He intihsiakna thianghlim hian faina kawnga Mizoram mipuite rilru leh chetzia a thlak danglam ngei theih nan leh Mizoram hi India rama ram fai ber a nih ngei theih nana theihtawp chhuah theuh turin sawrkar chuan mipuite a sawm a ni.

Attachment

  • Loading attachment...