1328/2024-2025

Aizawl the 26th July, 2024 : Govt. Zirtiri Residential Science College (NAAC 'A' accredited) chuan vawiin khan Vanapa Hall-ah zirlai tharte lawmna 'Freshers' Social' leh zirlai tiṭhate chawimawina hun an hmannaah H&TE Minister Dr Vanlalthlana chu Khuallian a ni.

H&TE Minister chuan zirlaite chu taima tak leh tihtak zeta lehkha zir turin a fuih a. Tunlai khawvelah mi taima leh ti takzet te chauh an dinchhuah theih thu leh han hlawhchham rap rap pawh hlau lova theihtawp chhuah turin a fuih. Hlawhtlinna chu a thlawna neih chi a nih loh thu leh sualchhuah ngai anih thu uar takin a sawi a. Zirtiri College Aizawl Venglai Campus-ah Skill Development Programme chak taka kalpui tum a nih thu a sawi bawk. Hei hian a bial chhunga mite leh Zirtiri College zirlaite tan hmasawnna pawimawh tak a thlen a beisei.

Govt. Zirtiri Residential Science College hi 2022 khan NAAC 'A' Grade hmuin kum tin MZU result-ah rank holder an neih ziah bakah tun kumah pawh mi 38 lai top 10 ah an lang a, heng zingah hian University Topper pawh zirlai 4 lai an nei a ni.

He hunah hian Principal Prof B. Zoliana pawhin thu sawiin, college hmasawna thenkhat a tarlan bakah Mizoram Sorkarin kawng hrang hranga Zirtiri College a enkawlnaah lawmthu a sawi.