1329/2024-2025

AIZAWL; the 26^th July, 2024: Vawiin chawhma dar 11:00 khan Labour, Employment, Skill Development & Entrepreneurship (LESDE) Minister Pu Lalnghinglova Hmar chuan Mizoram University (MZU)  Incubation Centre hnuaia “Entrepreneurship Development Centre”  a hawng. He EDC hi Indian Institute of Entrepreneurship (IIE) kaltlanga NEC in a lo sponsor a ni.

Vawiin MZU EDC hawnna programme-ah thu sawiin LESDE Ministe Pu Lalnghinglova Hmar chuan vawiinah hian Building kan hawng satliah mai a ni mai lova, hmathlir (Vision) kan tlangzarh tel a ni. Chu kan hmathlir-ah chuan  kan ram hmasawnna tur leh thanlenna tura kan suangtuahna (Dreams) te chu Entrepreneurship kaltlangin a tak ramah a chang dawn a ni. Entrepreneurship programme kaltlangin kan thalaite talent peipun a, chhawr tangkai a ni ang a, chu chuan kan ram economy a ti thang lian dawn a ni. Kan ram economy chawinunna thisen zunzam chu Entrepreneurship hi a ni a, Entrepreneurship hian thilthar ngaihtuahchhuahna/chinchhuahna (Innovation) chu kan thalaite-ah a chhem-alh ang a, chu chuan eizawnna ngialnghet leh khawtlang hmasawnna a hring chhuak dawn a ni.

Entrepreneurship hi Mizoramah pawh a lar chho viau a, kan thalai tam tak pawhin an bawh mek zel a ni. Hetiang a ni mek lai hian Entrepreneurship in Risk a ken tel erawh I hre reng ang u.  Market demand inthlak reng te, Business planning mulmal lo vang te, competition nasa lutuk leh tanpuitu awm loh avang te in, IBM Institute for Business value and Oxford Economics in kum 2021 a zirchianna a neihah chuan India rama company ding thar (Startups) 90% te  chuan an company din atanga  kum 5 chhungin  an hlawhchham a ni, a ti.  United State Bureau of Labour Statistics chuan Startups 65% chuan kum 10 chhungin an hlawhchham a, 10% chauhin hlawhtlinna an hmu a ni, a ti bawk. Heng te avang hian kan thalai Entrepreneur te chuan tumruhna leh taimakna an nei a, an tei rei peih a ngai hle dawn a ni. Netflix, Facebook, Amazon etc. te hlawhtlinna phenah hian thawktu tumruh, taima leh teirei peih an awm a ni, a ti. Minister chuan sawi zelin, Entrepreneurship-a hlawhtling tur chuan idea neih that te, taimak te, market trends hriatchian.etc. te bakah thil pawimawh deuh pakhat chu Networking thiam hi a ni.  Tunlai khawvelah chuan academic degree hrawl tak tak ai mahin networking thiam hian kawngro a su tawh zawk a ni, a ti bawk.

Vawiin EDC hawnna programme-ah hian Prof. Laldinliana, Director MZU Incubation Centre chuan welcome address sawiin, MZU Incubation Centre hnuaiah hian Company 38-ah an enkawl mek thu a tarlang bawk.

Vawiin programme-a khualzahawm Prof.Dibakar Chandra Deka, Hon’ble Vice Chancellor MZU pawhin thu sawina hun hmangin, Incubation centre te siamchhuah Apps 2: Sentezel leh Thlado  a tlangzarh nghal  a ni.

Brian Laldinsanga, Centre Head-MZU EDC chuan lawmthu sawiin, vawiin programme hi a khar ta a ni.