Higher & Technical Education Minister Pu R. Romawia chuan vawiin khan Govt. Aizawl North College leh Geography Association of Mizoram (GAM) tangkawpin a buatsaih, National Seminar on Regional Disparities and its Consequences chu Govt. Aizawl North College Hall-ah a hawng. He Seminar hi September ni 29 - 30, 2016 chhung a awh ang a, University Grants Commission (UGC), State Bank of India leh UD&PA Department ten an sponsor a ni.

Minister Pu R. Romawia chuan thupui pawimawh tak hmanga Seminar buatsaih a ni chu lawmawm a tih thu sawiin, a chhimtu leh presenter zawng zawng ten thiamna thar, mipui tana hlawkna tur an chhar a beisei thu a sawi a. Minister chuan ram leilung leh khaw chin inan loh avangin mihring nunphung leh ei leh bara hmasawnna rualkhailo hi thil awm thin a ni a, Mizoramah pawhin hemi avang hian harsatna kan tawng nual a; Amaherawhchu heng harsatna te hi min dangtu nilovin chona ah kan la thin tur a ni, a ti. Mizoram hun hmalamah chuan inkalphawhna kawng a la awm thatloh avangin mipui tangrualin an sial a, zirna in sang college din turin mipuiin hma an lak avanga kan college hmasa ber te chu din a nih tak thu sawiin, H&TE Minister chuan hnam taima leh tlawmngai kan nihna hi hre reng chungin kan thawh ve theih chin chu tih kan tum thin tur a ni a, thil engkim hi Sorkar kutah kan dah tur a nilo, a ti a ni.

Khuallian chuan Mizoram chu kawng thenkhatah hnufual deuh mahse ram vannei tak kan nih thu sawiin, ngaihtuahna fing leh hmangchang hriatna nen taima taka kan thawhho chuan ram nuam leh zual, hmasawnna chak tak ah kan siam theih thu a sawi a. Hmun dangte laka chhuan tur kan neih thenkhat tarlangin, ram muanawm taka kan chen te, eizawnna kawnga hmeichhia te tan phuarna awm lovin mipa leh hmeichhia an thawk tlang thei te, ramngaw tha tak leh leihnuai hausakna, tunlai thiamna leh zirchianna hmanga nakin lawka ram hmasawnna atan tangkai em em thei tur kan neih te hi kan vannei hle a ni, a ti a. Kan leilung leh leihnuai hausakna te hi kan mithiam te leh Sorkar tangkawpin hman tangkai theih dan tur ngaihtuahin hmalakna tur a awm thu a tarlang a. Minister Pu R. Romawia chuan zirlai kalkhawmte chu an thiamna leh ngaihtuahna te a tha zawnga hmang turin leh thawhpui ah a sawm a ni.

National seminar hawnna hun hi Pu V. Lalnunmawia chuan kaihruaiin, Govt. Aizawl North College Principal Pu Vanlalduha leh Dr. Lalrinmawia, Oganizing Secretary atangte in thusawi ngaihthlak niin, Pu Thangkima, Vice-Principal in lawmthu sawiin hun a khar a ni. He ni hnih awh seminar-ah hian topic hrang hrangah paper 23 present a ni dawn a ni. Tun dinhmunah Govt. Aizawl North College ah hian zirlai 1309 an awm a, zirtirtu 28 awm in, non-teaching staff 12 an awm bawk.