India Danpuiin 6th Schedule Areas inrelbawlna leh kalphung enkawl hna chu Governor kutah a dah angin Mizoram Governor Lt Gen Nirbhay Sharma chuan Mizorama Autonomous District Council 3 awm - LADC, CADC leh MADC - hotute chu kawmin an hmalakna hrang leh harsatnate a sawipui a. Tunkar chho khan LADC leh CADC te nen meeting a neih hnuah vawiin khan Governor Pu Nirbhay Sharma chuan Mara Autonomous District Council CEM leh hotu dangte bakah Mizoram sorkara department hrang hrang officials pawimawhte Raj Bhawan Conference Room-ah kokhawmin MADC huamchhunga hmalakna kalpui mek leh hmathar lakna tur an sawiho.

Larsap kaihhruaina hnuaia vawiina meeting neihah hian MADC CEM Pu R.T.Zachono chuan Mizoram Governor awm tawh zingah Pu Nirbhay Sharma chu Autonomous District Council hmasawnna ngaihtuah a, Council hotute kokhawma an inrelbawlna dan sawipuitu hmasa ber a nih avangin lawmthu hrilhin ‘Letter of Appreciation’ a hlan a. CEM chuan an hmalakna hnuaiah Dan chi hrang hrang 22 pawm (passed) a nih thu te, an khawpui ‘Saiha’ tih thin chu Mara tawng ‘Siaha’ tia thlak a nih thu te, sum harsatna an tawh thin engemawchen chu chinfel a nih thu te, hmasawnna project 9 zawhfel, school building 15 sak zawh leh rural housing scheme hnuaia rangva hlawm 4286 semchhuah a nih thute a tarlang a. Sum (revenue) dehchhuah kawngah handloom leh handicraft, Vety farm, quarry, fisheries leh marboat te an hman tangkai thu a sawi bawk. Hriselna lamah nausen/naupang thihna leh nu nau chunga thi tam thin chu Health Department nena tangdunin an titlem thei tan thu a tarlang bawk. Zirna lamah Mara zirlaite tawng thiam tam tir tum a nih thu sawiin CEM chuan an huamchhunga sikul zawng zawng chu English Medium-ah leh vek a nih tawh thu leh Hindi tawng an belh zual nan Hindi zirna bu ‘Maraland Bharti’ chu sikul tinah pawl 5 atanga pawl 8-ah zirtir vek a ni, a ti. Mara thalaite kawng chi hrang hranga training pek leh eizawnna lamah puih nan ‘Youth Service Cell’ din an tum mek thu a tarlang bawk. mipuite hrilhhriat zau nan awareness campaign an mamawh thu an thlen bawk.

Vawiin meeting-ah hian CADC aiawhin CEM Pu R.T.Zachono, EM(Edn) N.Zakhai, Executive Secretary V.Zacho, LO K.Machhua te an tel a. Mizoram sorkar atangin District Council & Minority Affairs Secretary Pu Rodney L.Ralte, Secretary to Governor Pu Biaktluanga, Sr.Audit Officer(C) Pu S.Sinha, SRO(Planning) Pi Anne Nikhumi bakah Labour, Employment & Industrial Training, Health, Law & Judicial department officials engemawzat an tel a ni.

Mizoram Governor Lt.Gen.Nirbhay Sharma chuan tunkara Autonomous District Council (ADC) 3 hotute a kawmnaah an Council Area chhunga chengte hamthatna leh hmasawnna thleng tak tak tur chuan Autonomous District Council leh state sorkar te inrawn zel a thawhhona tha an nei a tul thu a sawi a. ADC 3 te mamawh leh harsatna tawhte a inang hlea a hriat thu leh beisei angin hna an thawk chak lo chu pawi a tih thu a sawi bawk. ADC 3 hnuaia officials leh hnathawkte chuan an area chhunga khaw tinte tlawh chhuaka, mipuite mamawh leh harsatna bakah an hmasawnna atana hmalak dan tur zir chiang tura a duh thu a hrilh a; a bik takin zirna, hriselna leh skill dvelopment lamah tanlak a tulzia a sawi. NITI Aayog guidelines-in a phut angin District Council Level Commitee leh District Level Monitoring & Review Committee din vat tur leh State Level Committee-a an zinga atanga member ruat tura tih an nih angin a rang theih ang bera hma la turin a hrilh a. ADC 3 hnuaia officials leh staff dangte tan ATI, Aizawl-ah department hrang hrang kaihhnawih training buatsaih a that thu sawiin Larsap chuan an hnathawh hrang hrangah District Council & Minority Affairs Department te nen inrawn zel turin a hrilh a. Mizo thlaite tan Army Recruitment Rally buatsaih a nih thin chu a lawmawm rualin sipaia tang duh tur thlaite training pek lawk a that thu sawiin Larsap chuan Mizoram Police, Assam Rifles, BSF leh CRPF atangin anmahni training pe tur leh medical check-up neihpui tura sawm tura hrilhin zirna piah lamah tawng thiam tam a pawimawh thu a hrilh. ADC area 3 te chu hriselna lamah tan la lehzual tura chahin Pu Nirbhay Sharma chuan vaihlo zuk leh hmuam laka insum theihna ngai pawimawh tura hrilhin ADC hotute leh hnathawkte chuan hemi kawnga hmahruaitu ni a, midangte tana entawntlak ni turin a chah bawk.

Attachment

  • Loading attachment...