Vawiin khan Champhai DC Conference Hall ah Champhai District chhung kawngpui chhia avanga mipuite harsatna tawh mek sut kian dan tur ngaihtuah a, District thu neitute meeting chuan October 5, 2016 atanga thlahnih chhung awh tur CrPC Section 144 hmangin Champhai District pumah lirthei keruk aia tam hmang chin tlan khapna thupek siam a rel. Meeting hi District Bawrhsap Pu Vanlalngaihsaka, IAS in a kaihruaia, Project Director DRDA, SE(PHE), Addl. SP, EE (PWD), EE(P&E), SDO(S), DTO leh BRTF thuneitute bakah NGO Coordination, Sub-Hqrs. YMA leh MJA Champhai aiawhte an tel.

Kawng chhiat avanga mipui harsatna tawh mek thlir chungin vawiina DC hova meeting chuan October 5, 2016 atanga thlahnih chhung awh turin Champhai District puma hman turin CrPC Section -144 hmangin lirthei keruk aia tam hmang zawng zawng tlan khap na thupek chhuah turin a rel a. He khapna hian mipui mamawh, Essential Commodities Act in a huam chin phurtute erawhchu a huam lo vang. Hemi hun chhung hian BRTF te chu Khawzawl - Kawlkulh inkar kawng atanga tan in a tahtawla kawng thawm that hna chak taka kalpui tura ngen niin BRTF aiawhtu OC 74RCC (GREF) chuan meeting ngena hi tihlawhtling tura bawhzui nghal a tum thu a sawi.

Vawiina meeting chuan mi thenkhatin leihlawn chunga lirthei an dah thin te, lung, balu leh thildang an chhek thin te chu ngaihmawhawm an tih thu sawiin BRTF leh PWD hotute chu hemi chungchanga khapna leihlawn tihah tar turin a ngen ngal.

Meeting-ah hian Seling-Champhai kawngpui chu March ni 4, 2014 khan National Highway - 6 ah puan a nih thu leh State PWD kuta hlan fel a la nih loh avangin Kawlkulh - Khawzawl leh Seling - Keifang kawng thawmthatna tura sawrkar laipuiin a sanction tawh, cheng nuai 3,261.38 chu hman theih lova a la awm thu tarlan a ni a. Phal chin aia rit phur lirthei in an zawh nasat avangin tun hnaiah kawng a chhe chak hle a ni.