Vawiin khan Higher and Technical Education Minister Dr R.Lalthangliana chuan Institute of Advanced Studies in Education (IASE) Festival 2019, IASE Auditorium-a neih chu khuallian niin a hmanpui.

Minister Dr.R.Lalthangliana chuan kalkhawmte chu anmahnia theihna Pathianin a dah hmang tangkai tur leh tih tak takna an neih phawt chuan sang takah an invawrh thei tih hria a, mahni indahhniam lo turin a chah. Zirna siam tha tur leh zirna in tha, zirtirtu tha, zirna tha nei thei tur chuan zirtirtute leh zirlaiten mahni nihna an inhriat chian hmasak a,  an mawhphurhna an hlen a pawimawh, a ti a. Zirtirtu chuan naupang kaihruaitu leh kawng dik kawhhmuh tu tur an nih inhriain an tawngkam, chetzia leh incheidan thlengin an uluk tur a ni, a ti. Sawrkar hmalakna thar SEDP ah zirna ngaih pawimawh a nih thu Minister hian a sawi a. Zirtirtu thawk lai leh la thawk tura inbuatsaih mek IASE a training-te chu zirlai chhawrtlak leh hmantlak an chherchhuah theih nan zirtiru hna an thawhna hmun apiangah an tum ber chu quality education a ni tur a ni, a ti. H&TE Minister chuan IASE a zirtirtu indaihlohna sukiang turin theihtawp chhuahpui a inhuam thu leh academic piah lamah hmasawnna ruhrel infrastructure a ngaih pawimawh thu a sawi bawk.

Mizoram Institute of Education ni thin tuna Institute of Advanced Studies in Education lo ni ta hi kum 1975, March thla ah a ding tan a, IASE ah kum 2012 khan hlan kai a ni. Mizoram University hnuaiah affiliation neiin Regulatory Body pahnih UGC leh NCTE in a enkawl a ni. IASE ah hian tun dinhmunah zirlai (student-teacher) 706 an awm a, zirtirtu 19 in an enkawl. Mizorama post graduate degree course zir theihna hmasa ber a ni a. M.Phil leh Ph.D zirna pawh kum 2019-2020 academic session chhung hian hawn a ni dawn a. Mizoram sawrkar hnuaia Research Degree Course zir theihna hmasa ber leh awm chhun a ni rih dawn a ni.

Vawiin programe hi H&TE Secretary Pu Biaktluanga, IAS chuan a kaihruai a. IASE Principal Prof. Vanlalhruaii’n kalkhawmte lawmna thu a sawi. Minister hian IASE a zirlai tha ber - Best Student of the Year 2019 Award a sem a. B.Ed zirlai atangin Laldinsangi leh M.Ed zirlai atangin Lalruatfeli Zadeng ten he chawimawina hi an dawng a ni. IASE Conference Room thar leh cafeteria te chu Minister Dr. R.Lalthangliana hian a hawng nghal bawk a ni.