3618/2023-2024

Aizawl the 1st February, 2024 : Vawiin khan Higher and Technical Education Department Minister Dr. Vanlalthlana chuan Institute of Advanced Studies in Education (IASE), Republic Veng-a New Age Learning Centre thar chu hawngin Semester Opening Programme Khuallian-ah a tang zui nghal.

New Age Learning Centre hi ICT Based Library resource hmunpui a ni a, UD&PA Dept. hnuaia Aizawl Smart City Ltd. bul tuma din a ni a, Pi Malsawmtluangi, Asst. Architect-in technical report a pe.

H&TE Minister Dr. Vanlalthlana chuan Learning Centre changtlung tak zirna in-a din a ni chu lawmawm a ti a. Khawvel changkang zelah thiamna leh resource neihte puntir ve zel a ngai a, zirlaite tana tangkai tak tur hmanraw tha leh changtlung tak a awm ta chu lawmawm a tih thu a sawi. Zirlaiten hlawk taka an hman theih nana hmalatu Department-te chungah lawmthu a sawi bawk.

New Age Learning Centre hawnna hun hman zawh hian IASE Semester Opening Programme hman zui niin Prof. Lallianzuali, IASE Principal-in a kaihruai a. Minister chuan Teacher Education Institute-a zirlai – B.Ed., M.Ed. leh Ph.D te chu hma lam huna zirtirtu rintlak leh ram innghahna tur an nih thu hrilhin, Zirlai nih lai atangin zirtirtu tha, rinawm leh inpe mi ni tura rilru siam turin a fuih a. Research Institution a nih angin Research Project lian tham lak luh kawngah te theihtawpa hma la turin thawktute leh zirlaite a chah bawk.