1792/2023-2024
Aizawl, 07.09.2023: Higher & Technical Education Minister Dr. R. Lalthangliana chuan vawiin khan Women's Polytechnic, Aizawl (WPA) in Silver Jubilee an lawmnaah khuallian niin a hmanpui.

Minister chuan Jubilee pual souvenir lehkhabu 'Thadang' chu tlangzarhin, thu a sawi a. Women’s Polytechnic, Aizawl in kum 25 na lawm theia an awm chu a lawmpui thu leh thalai tangkai tak tak, eizawnna kawnga hlawhtling tak a chhawrchhuah zui zel a duhsak thu a sawi. Minister Dr. R. Lalthangliana chuan sawrkar hna kan indaih seng vek loh avang leh economy in hma a sawn zual nan mahni kutkawih eizawnna te, private enterprise a thawhte pawh a nachang hriat zel tha a tih thu sawiin, hetiang kawngah hian innghahna tham thiamna pechhuak tura WPA in zirtirna a pe chu lawmawm a tih thu a sawi a. Mizoram chu India ramah lehkhathiam tam berna zingah tel mahse kan thiamna hi a daihzai lo tiin, eizawnna kawng hrang hrangah thleng sang tak tak tun dinhmun aia tam zawk mi an awm theih a, medical field leh thil dang dangah mipui mamawhna phuhruk tura mithiam leh rawn tlak kan neih nan tan lak tul a tih thu Minister hian a sawi bawk. Aizawl Women’s Polytechnic ah chuan Mizoram hmun hrang hrang hmun hla tak tak atang te’n zirlai kalkhawmin, chhungkaw dinhmun pawh inanglo tak tak an awm a rin thu a sawi a. Eng dinhmun atanga chhuak pawh ni ila, nakin kan dinhmun tur chu kan taihmakna te, kan tumruhna leh thahnemngaihnaah a innghah thu a sawi.

H&TE Minister chuan covid hripui len hun khirh tak tawh laia women’s polytechnic zirlai leh thawktute’n PPE suit an lo thui thu te tarlangin, lawmthu a sawi a. Covid hri lenlai leh a hnu thil thleng - lirnghing te, vawk hri leng te, thenawm state nen a ramri a buaina chhuak te, thenawm ram leh thenawm state a buaina chhuak avanga raltlante lo chhawmdawl chungchangte sawiin. Minister chuan heng hun khirh takah hian Mizote kan inunauna leh kan inhmangaihna langin, that kan inchhuah tawn thin chu lawmawm a tih thu a sawi. Sum lamah harsatna awm phah mahse boruak tha zelah hmasawnna hna thawh kawngah sawrkar chuan theihtawp a chhuah zel thu a sawi a. Aizawl Smart City project hnuaiah Women’s Polytechnic tan classroom thenkhat thawmthatna tur sum dah a nih thu a sawi bawk. Minister chuan WPA chuan course pawimawh tak tak an zirtir nia a hriat thu sawiin, zirtirna quality tha kan duh ang bawkin zirlaite an pass chhuah a, hna an thawh hnuah pawh an kutchhuak chu belhchiandawl ni zel tiin zirlaite a chah a. Minister chuan higher education changtlung zawk siam tura hma lak a nih dante sawiin, state sawrkar university din tura hmalak a nih dan te a sawi a. Mizoram sorkar college te pawh NAAC accreditation ah grade tha tak tak hmu an awm thu te a sawi a. Hmasawnna atana pawimawh em em pakhat hriselna kawngah pawh Mizoramin hma a sawn theih nana infrastructure tha zawk siam tura hma lak a nih thu a sawi bawk a. Infant Mortality Rate (nau piang 1000 zela nausen thi zat) hniam ber kan nih thu leh NITI Aayog in India state leh UT te hriselna tehfung a siamah Mizoram chu state lian vaklo ho zingah pakhatna dinhmunah a din mek thu a sawi bawk.

Women's Polytechnic, Aizawl chuan ni li chhung - September ni 4 atanga ni 7, 2023 thleng Silver Jubilee lawmna hi an buatsaih a. WPA Principal Dr. H. Lalchhuanvela chuan thu a sawi bawk a. Kum 1998 September ni 7 kha class tan ni a nih avangin Women's Polytechnic, Aizawl din niah ziaka pawm a ni. Vawiin programme-ah hian Principal lo ni tawh thin mi 4 te chawimawina neih a ni a, documentary tlangzarh a ni bawk.