No.2933/2021-2022

Aizawl, 10th November, 2021 : Human Resources Development Board (HRDB) Govt., of Mizoram leh Mizoram Information Technology Society (MITS) te chuan vawiin khan HRDB Vice-Chairman Pu L. Thangmawia office-ah thawhhona thuthlung an ziak.

Thawhhona thuthlungah hian Mizoram sorkar aiawhin Human Resource Development Board Vice-Chairman Pu L.Thangmawia, MLA, School Education Director Pu James Lalrinchhana, SCERT Director Pi Laldawngliani Chawngthu, MBSE Secretary Pu Lalthangbika, Samagra Shiksha State Project Director Pu Lalhmachhuana ten hming an ziak a, Mizoram Information Technology Society (MITS) aiawhin an President Dr. C. Lalnuntluanga leh General Secretary Pu C. Lalrinawma ten hming an ziak ve thung.

Thawhhona thuthlungah hian Mizorama zirna tihhmasawn nan, ICT kaihhnawih hmalaknaah MITS leh School Education Department hnuaia peng hrang hrang te a remchan dan ang zela an thawh ho thin tur thu te, Project leh programme sawrkarin ICT kaihhnawiha a siam, MITS mamawhna a neih apiangah a tul anga sawiho a, mumal taka inbiakna neiin thawhho dan tur duan thin te, ICT tangkai zawka zirna lama hman dan tur kawngah MITS in Mizoram sawrkar ah HRD Board kal tlanga rawtna a thlen theih tur thute a ni a. Thawhhona hi thuthlung ziah ni a?anga chhiara kum khat chhung a ni ang a, a tul anga ennawn zel theih a ni ang.

Pu L. Thangmawia chuan zirna lama Zoramin hma a sawn theihna tura MITS nen an thawkho thei tur chu lawmawm a tih thu a sawi a, National Education Policy, 2020 hian Information technology (IT) hman tangkai hi a ngai pawimawh em em a, NEP, 2020 lo zirchianga IT hman tangkaina tur rawtna siam turin MITS leh official kalkhawmte a chah a ni. Zirlaite bakah zirtirtute pawh IT lama hmasawn tir tura tan lak a ngai hle tih sawiin hemi atan hian ruahmanna mumal tak thawhhona kaltlang hian kan siam a ngai a ni, a ti a. COVID-19 vang hian engchen nge harsatna kan la tawhn dawn a hriat loh avangin IT hman tangkai hi a tul zual hle a ni a ti bawk.

MITS President Dr. C. Lalnuntluanga pawhin IT hmang tangkaia zirtirtute training mumal taka pek dan turte, Mizo Tawng tihchangtlun kawngahte theih ang angin hma an lo la tawh thin tih a sawi a, zirlaiten IT tangkai taka an chhawr theih dan tur ruahman kawnga sawrkarin a thawhpui chu an lawm tih sawiin, theihtawp an chhuah dawn tih a sawi a ni.

Zirtirtu leh zirlaiten an chhawr tangkai theih tur, online hmanga an zirlai leh a kaihhnawih thil awlsam taka an hmuh leh dah theihna tur ORSEM (Open Repository of School Education Mizoram) siam dan turte, School hrang hrang ten awlsam leh tangkai zawka ICT an hman theihna tur ruahmanna tha siam chungchangte leh thil pawimawh chi hrang hrang vawiin thawhhona thluthlung ziahnaah hian an sawiho nghal bawk a, Science Teachers’ Association Mizoram (STAM) Vice-President Pu Lalhmukina pawhin Science zirna kawga IT hman tangkai dan tur ruahmanna an siamte a sawifiah bawk a ni.