853/2022-2023
Aizawl the 10th June, 2022 : Vawiin chawhnu khan Science Teachers’ Association of Mizoram(STAM) in an buatsaih, HSLC leh HSSLC a Mathematics Science subject topper te STAM Proficiency Award hlanna hun, School Education Conference Hall, Education Centre, Treasury Square-a neih chu HRD Board Vice Chairman Pu L.Thangmawia chuan khuallian niin a hmanpui a, ‘Zofate zingah Scientist leh Mathematician ropui tak tak kan awm tam a hun tawh hle a, hnam dang ten hemi kawngah min kal pel thui tawh hle a, Civil Service-a lut tura kan beih nasat ang tluk bawkin Scientist ropui tam tak nei tura tan na sa zawka kan lak a ngai a ni” a ti.

Pu Thangmawia chuan zirlai thiam thei leh taima, STAM Proficiency Award dawng tute a lawmpui thu sawiin tuna a ber(topper)an nihna hi vawng nung zel a, Scientist ropui, India ram leh khawvel huap ang pawha mi thiambik an nih theih thu leh chutiang chu Zoram mamawh berte zinga mi a nih tawh thu hrilhin ram leh hnam tana thiamna lama tan la sauh sauh tur a fuihin, Mizoram hian MBSE Science leh Mathematics topper te atangin beiseina sang tak a neih thu leh hun lo kal zel turah an hnen atanfa hlawhtlinna ropui tak beiseia a lo thlir reng tur thu a sawi bawk.

Pu Thangmawia chuan “Zofate zingah India ram leh khawvel huap ang pawha lang phak Scientist leh Mathematician kan la nei tlem hle a, lehkha thiam thei te nih tura a nawlpui anga kan duh ber nia lang chu Civil Service lam te a ni a, mahse ram hmasawnna tak tak thlen theihnana tangkai berte chu Scientist te an ni. Kan mamawh khawp buh leh bal kan thar chhuah theihnan te, khawl leh thil dang zopa mil kan siamchhuah theih nan te, kan ram thing leh mau tangkai zawka sawng bawl a nih theih nan te, ramhhmul damdawi sawngbawl nan te, kawngpui tha zawk kan neiha theihna tur leh kan mamawh tam takte Science thiamna hmanga kalpui a tul tak zet a ni” a ti.

He Award semna hun hi Pu R.Lalengmawia, President, STAM in a kaihruai a, Pu Lalmuanpuia, Jt Seretary, STAM chu Master of Ceromony niin topper 16 te hnenah Award hi hlan a ni a. Award hi mi inphalte thawhkhawm niin citation bakah sumfai a keng tel a. He hunah hian Award dawngtute leh sumpai thawhtu(Donor) ten thu an sawi a, Pu Zothanliana, General Secretary, STAM chuan lawmthu sawiin hun a khar a ni.