854/2022-2023
Thingsulthliah, 10th June, 2022 : Power & Electricity Department etc., changtu Minister Pu R. Lalzirliana chuan vawiin khan a bial chhunga mi Thingsulthliah Higher Secondary School-in Higher Secondary School Leaving Certificate, 2022 Examination a hlawhtlinna an neih lawmna leh zirlai lut tharte lawmna hun a hmanpui.

He hun puala inkhawm Thingsulthliah Higher Secondary School-a buatsaihah Pu R. Lalzirliana chuan result tha tak an neih chhan pawimawh tak pakhat chu School Managing Board leh Thingsulthliah leh a chhehvel khua ten an phurpui vang leh thahnem an ngaih pui vang a ni, a ti a. Zirtirtute leh zirlaite lawmpuina thu hlanin an chhuang takzet tih a sawi a ni.

Pu R. Lalzirliana chuan zirlaite chu tum atanga an nih tum hre lawka, thutlukna felfai tak siama an zirna chhunzawm turin a fuih a, lehkhabu tha chhiar taimak a tul thu leh an zirna pui tura tunlai thiamna (technology) chhawr tangkai thin turin a chah a ni. Tuna an hlawhtlinna chan hi a tawp an thlenna tur kawng chanve chauh a la nih thu sawiin tunlai khawvel inelna sang tawh takah hian an damkhawchhuak thei tih hria a, tumruhna leh tawrhchhelna nen theihtawp chhuah zui zel turin a fuih bawk a ni.

Thingsulthliah Higher Secondary School hi kum 2004 a din a ni a. Kum 2021 - 2022 khan pawl 12 zirlai mi 97 awmin an zinga 95 hian HSSLC, 2022 exam an hmachhawn a, hripui leng vangin an zinga mi 1 hian subject zawng zawng a exam kim thei lova, exam kim thei mi 94 zinga 93 in hlawhtlinna an chang (Distinction - 6, First Division - 58, Second Division - 25, Third Division - 4) a, pass percentage hi 98.94% a ni.

Thingsulthliah Higher Secondary School-ah hian zirtirtu (lecturer) 12 an awm mek a, Minister hian zirtirtu indaihlohna chhawk zangkhai turin zirtirtu hlawh cheng 20000 thla tin a thawh a, school tihchangtlunna turin classroom panna kailawn (step) siamna tur Rs. 1,50,000/- leh generator 1.5 kva a pe leh dawn a ni.

Pu R. Lalremliana, Chairman, Managing Board, Thingsulthliah Higher Secondary School in inlawmna thu a sawi a, Pu R. Lalfakawma, Principal, Thingsulthliah Higher Secondary School-in report a pe bawk a ni.