855/2022-2023
Dated Serchhip, the 10th June, 2022: Vawiin khan AH & Vety Farm, Thenzawl-a Sial pa chi tha vulh punna hmun thar hawnna hun buatsaih a ni a, Dr. K.Beichhua, Minister, AH & Vety, etc., chuan khuallian niin he hmun hi a hawng a. Pu C. Lalmuanpuia, MLA, Vice Chairman, AH & Vety and Sericulture Board chu khualzahawm a ni.

Khuallian Dr. K. Beichhua chuan, tihtak zeta beituten Pathian malsawmna an dawng thin a, thawkrimte tana din chhuahpui theihna tur malsawmna, ram tha, sik leh sa nuam tak min petu Pathian hian State rethei leh hnufual bik tura min siam a rinawm loh a, mitinin theihtawp chhuaha mahni zawna hna kan thawh theuh a pawimawh em em a ni, a ti a. Sial vulhtuten hlawhtlinna sang tak an hmuh theih nan vawiinah a pa chi tha vulh punna hmun tur kan han hawng thei ta hi a lawmawm hle a, rah duhawm tak a chhuah ngei ka ring tlat a ni, a ti. Minister chuan, Mithun Stud Farm hawn tak chu sawrkar hmasain hma a lo lak tan tawh a nih thusawiin bul lo tantute chungah lawmthu a sawi a. Mizoram chu sa ei nasa pawl tak kan ni a, mahse sa eitur thar chhuah lamah kan hnufual hle thung si a,  sa thar chhuah a lo pun zel theih nan vawiina kan hawn tak Stud Farm hian nasa taka min puih kan beisei a, sial vulh hi eizawnna tha tak a ni tih hriaa thalaite pawhin kan uar deuh deuh a tul a ni, a ti.

Khualzahawm Pu C.Lalmuanpuia, MLA pawhin thusawiin, sawrkar in kan ram chu saa intodelh tir a tum mek a, tuna Sial vulhna hawn fel tak pawh hi kan in todelh tur kawng hawngtu pawimawh a nih ka beisei a ni, a ti a. Hmanlai ah chuan Sial ngah chu mihausaa ngaih an ni thin a, vawiinah pawh Sial ngah theite chu mi hausa an tling a ni. A bul ṭanna chauh la ni mahse hmasawnna rahbi pawimawh tak a nih avangin a lawmawm hle a, hetiang hmun pawimawh tipuitling tura theihtawp chhuahtu Chief Minister leh AH & Vety Minister chungah lawmthu ka sawi a ni, a ti.

Mithun Stud Farm hawnna inkhawm hi Pi  Lalzarmawii, IAS, Secretary, AH & Vety chuan a kaihruai a, Pu Lalremliana, Director, AH & Vety chuan an hmalak dan leh ruahmanna an neihte sawiin, Sial chi tha, a chi thlahtu tur a pa tharchhuaha, Sial vulhtute hnena hlan thin chu he Farm in a tum ber a ni a. Mizorama kan Sial vulhte hi an nih ang anga kan vulh mai chuan a chi thalo an lo chhuah theih thin avangin, a chi tha tharchhuah kha he Farm in a tum ber a ni, a ti.

Thenzawla Sial Vulhna, Mithun Shed Farm hawn tak hi NEDP project hnuaiah cheng vaibelchhe 3 senga sak a ni a, Ran In pathum - a note leh ṭhanglai in,  a pa in leh a pui in a awm hrang a, Ran In pakhatah hian ran 20 bawr vel zel an leng a. Tunah hian a pa 1 leh a nu 6, thla 10 atanga thla 28 inkara upa a awm mek a, Leng, Khawbel leh Riangtlei atanga lakkhawm te an ni.