Govt. J.Thankima College buatsaih Human Rights Education zirhona chu vawiin khan I&PR Conference Hall-ah Higher &Technical Education Minister Pu Lalsawta’n a hawng.
Pu Lalsawta chuan tharum hmanga rorelna hun a ral a, ram ropuina tehfung atana ram zau tak awpbeh leh sipai chakna a innghah hunlai te a kianga, tunlai hunah chuan mihring dikna leh chanvo humhim a tulzia khawvelin a lo hre ta deuh deuh a ni, a ti. Minister chuan retheih luat tuk vang te, pianphung leh rilru lama rualbanloh vang te, hmeichhe awmnem zawk nih avang ringawt te in mihring dikna leh chanvo (human right) diklo taka rahbehin a awmfo thin, a ti a. Seminar chhim tura lokal zawng zawng te chu diklo taka chanvo inlaksakna thleng fo thin nuai bo tura kawng engemawti tala mi tangkai ni thei turin a fuih a ni.
Seminar hawnna inkhawm hi Govt. J. Thankima College Associate Professor Pu Lalthlamuana’n a kaihruai a. Pu Ramhmangaiha Ralte, Principal Govt. J. Thankima College chuan inlawmna thu sawiin Seminar Organising Committee Secretary Pi Maria Lalremruati’n he Seminar buatsaih a nih dan tlangpui Report a pe a, Asst Proffessor Dr. JV Nunchunga’n Keynote Address a pe a ni.
Vawiin hian thupui pawimawh tak tak hmangin Pi Marli Vankung, Mizoram Legal Services Authority-a Member Secretary ni lai te, State Commission for Women-a Chairperson Pi Lalnipuii te, College of Teachers Education-a Associate Proffessor Pi Lallianzuali Fanai te leh Govt. Kolasib College-a Associate Professor Pu Lalhmanmawia te’n thu an sawi a. Naktuk tlaiah Seminar hi khar a ni ang.
