Hun thar leitlahniam siam leh thawmthatna atan hmalakna, Detailed Project Report (DPR) chungchangah vawiin khan I&PR Minister Pu Lal Thanzara leh DM&R Minister Pu C. Ngunlianchunga te chu Chief Minister Conference Hall-ah DM&R hotute nen an thukhawm.

Minister Pu Lal Thanzara, leh Aizawl North-III bialtu MLA ni bawk chuan sawihawnna hun hmangin, leimin avanga veng mipui leh motor leh ke a veivak ten harsatna an tawh tiziaawm tura theihtawp chhuaha DM&R hotuten hma an la chu lawmawm a tih thu a sawi a; rah tha zawk a chhuah theih nan sawihona tha tak neih a beisei thu a tarlang a.

DM&R Minister Pu C. Ngunlianchunga pawhin Hunthar leh Rangvamuala lei tawlh chu a a chet zawm tawh loh nan, hna rintlak thawh a pawimawh zia leh, a rang thei ang bera hmalak a duh thu a sawi bawk a ni.

Vawiin meeting-ah hian DM&R Consultant Pu P.C. Lallawmsanga, IPS (Rtd.), DM&R Secretary Pu Zothankhuma, IAS, Director, Asst. Engineer leh A.I.E Consultancy Firm atangin member pathum an tel a. Hmalak tum anih dan te report pek niin, kawng chung leh kawng hnuai a hmalak dan tur te tarlangin, lei tawlh zel thei tur dang tura lung rem te, tui luan kawr leh check dam rinawm tak siam tum anih dan te sawiho a ni.