Mizoram-a HIV/AIDS natna hluar zel dona kawnga hma lak zui dan tur ngaihtuahin vawiin khan District AIDS Prevention and Control Committee(DAPCC) chu DAPCC Chairman, Pu Kannan Gopinathan, Aizawl District Bawrhsap hovin a office ah an thu khawm a. HIV/AIDS chungchanga Mizoram dinhmun thlir hovin he natna lo hluar zel laka invenna tur leh tih tlem na tura hma lakna tur pawimawh te an sawi ho.

Tun dinhmunah chuan India ram chu khawvela HIV hrik pai tamna ber pathumna niin mihring maktaduai 2 chuang (mihring za zela 0.30%) HIV hrik pai an awm a. India ramah Mizoram chu HIV hrik pai tamna ber pahnihna niin HIV hrik pai hi mi za zelah 0.68% an awm a ni. Kum 1990-2016 inkara Mizorama thisen endik mi 5,37,561 zingah HIV hrik pai 12,582 hmuh chhuah a ni a; chumi zinga 9,184 chu Aizawl district a mi an ni. Kum 2012-2016 September thla thlenga Aizawl district-a thisen endik zawng zawng 1,39,751 zingah HIV hrik pai 4,286 hmuh a ni a. Kum 2015-2016 inkarah tam berin hemi kum hian HIV hrik pai 1025 hmuh chhuah a ni.

Tuna Mizoram dinhmun atangin HIV/AIDS hi Mizoramah a darh mek zel tih a lan chian avang leh he natna do kawngah nasa zawka tan lak thar a nih loh chuan harsatna lian zawk thleng thuai thei a nih avangin High Risk Group zingah leh High Risk Place ah te uar zawka fimkhur leh invenna lam kalpui chhunzawm te, HIV/AIDS chungchangah pawl hrang hrang leh mipui te pawhin rilru zau zawk kan put theihna tura hma lak te, AIDS natna dona kawngah pawl hrang hrang te nen thawh ho te chu DAPCC chuan pawimawh an ti a. Sawihona atangin hma lak chhunzawm na tur ruahmanna duan tur a ni.