Vawiin chawhnu dar 2.00 khan Hunthar Veng MHIP Branch chuan Silver Jubilee leh MHIP Day chu ruai nen an lawm a; he ni lawmna inkhawm hi MHIP Hall tharah hman a ni a, Parliamentary Secretary chuan hall thar hi a hawng nghal a ni.

Pu Lal Thanzara chuan Hunthar Veng Branch-in anmahni puala hall changtlung tak an nei chu lawmpuina a hlan a, Branch entawntlak tak an nih thu a sawi. Mizo khawtlang nuna hmeichhiaten mipate chanvo ang chant ha tinreng an chang chho ta chu changkanna nasa tak a nih thu sawiin, “Kawng engkimah kan hmeichhiate hi mipate aiin in diau bik lo va, in chhuanawm tak meuh a; MHIP hmalakna azarah kawng tam takah sawrkar pawh a samkhai phah thin a. Nimahsela, Pathianin hmeichhiate hi mipate tanpuitu tura a siamte in ni a, chuvang chuan firfiak taka hmeichhiate hamthatna tura nawr chiam chiam hi Pathian malsawmna kawng daltu a ni thei a ni” Pu Lal Thanzara chuan a ti. Tun laia nupuite thawhchhuah ringa khawsa mipa tam tak an awm mek lai hian hmeichhiate chu an pasalte hnena an intukluh nasat zual a pawimawh thu sawiin Pu Lal Thanzara chuan, “Kan pasal fanaute hi a chawmtu zawk kan nih pawhin kan pasalte laka inlulin hi a Pathian thu lo a, kan pasalte chawimawitu ni tur leh fanaute enkawlna kawngah pawh inpekna thuk zawk nen MHIP Day hi i hmang ang u” tiin membete chu a fuih a ni.

Hunthar Veng MHIP Branch hian an branch silver jubilee hi ruai nen an lawm a, an hruaitu hluite hnenah chawimawina thuziak an hlan bakah, kum 2012 Local Council inthlana an member 3 thlantlinte hnenah chawimawina thuziak an hlan bawk Pu Lal Thanzara nupui Pi Zohmingthangi chuan Hunthar Veng Branch hnenah hian ei-siam dan bu pasarih a present a ni. Inkhawm hi an President Pi Lalhunlawmi’n a kaihruai a ni.