Tukin zing khan Health Department hnuaia National Programme for Prevention and Control of Cancer, Diabetes, Cardiovascular Diseases and Stroke (NPCDCS), National Programme for Prevention and Control of Deafness (NPPCD) leh AIKO bultumin Hunthar Veng MHIP Hall-ah Non-Communicable Diseases (NCD) Awareness Campaign & Screening Camp neih a ni a, Director of Health Services Dr. Rohmingthanga Ralte chuan kaihruaiin Health Minister leh bialtu MLA ni bawk, Pu Lal Thanzara chu khuallian a ni.

Pu Lal Thanzara chuan Hunthar Veng mipuite chu mahni sum senga damdawi in pan ngai lova hmun leh hmuna khawl changkang tak nena an inentir thei chu an vannei takzet a, natna an vei tih an hriat lem loh te pawh a hun takah hmuchhuakin enkawlna tha an dawng thei dawn a ni, a ti. Kan hriselna hi mahni kutah thui tak a awm a, hei vang hian ei leh in bakah zuk leh hmuam lamah kan insum a ngai hle a ni, a ti bawk. Health Minister chuan Mizote chu Kristian kan nih angin hrisel hle tur a beisei kan nih laia India rama a chhe zawnga a ber nihna kan hauh hi a zahthlak hle a, kan inthlahdahin sim tur kan nei tih i hrechhuak thar ang u, a ti.

Pu Lal Thanzara chuan Health Department in a vei ber chu HIV/AIDS hi a ni a, kan hriat leh hmuh theih aia nasa hian min luhchilh mek a ni, a ti a. Tun hma chuan drugs avangin miin HIV an kai thin a, tunah erawh chuan mipat-hmeichhiat hman khawlohna avangin  kan kai meka, tih takzeta kan do loh chuan kum 5 a ral meuh chuan kan do zawh loh khawpin kan kai nasa tawh dawn a ni, a ti. Mipuite chu taksa hriselna leh thianghlimna kawngah hmasawn kan ngaihzia hria a, tan la thar turin Minister chuan a sawm a ni.

Health Director Dr. Rohmingthanga Ralte chuan mimal hriselna mai duhtawk lovin vengchhung faina kawngah tan lak a ngaih thu a sawi a. NHM Director Dr. K. Lalbiakzuala pawhin kan khawsakzia changkang zel avangin kum 2008-09 atang khan zunthlum, thisen sang, stroke leh natna dang te a tam zia leh a vei te kan naupang telh telh tih hmuhchhuah a ni a. Kum 30-40 kalta atang khan sawrkarin health programme engemawzat lo kalpui tawhin natna chi hrang hrang tihrem a lo tum tawh a, chutiang chiah chuan he programme in a tum chu Non-Communicable Disease (NCD)-te tihrem bakah in finchhuah a ni, a ti bawk.

State Nodal Officer (NCD) Dr. Eric Zomawia chuan NCD chungchanga hriattur pawimawhte sawiin Indian Council of Medical Research (ICMR) hnuaia Population Based Cancer Registry-ah Mizo hmeichhia leh mipate, a bikin Aizawl District chu cancer natna chi 9-ah a ber nihna kan hauh fai vek a, Mizoramah kum tin cancer vei thar mi 1300 chuang hmuh chhuah niin mi 650 chuangin an thih pui ziah a ni, a ti bawk. Nunphung in a zirloh avang leh mahni inthunun theih loh vangin heng natna te hi lo awm a ni tih sawiin ei leh inah kan in her rem hret bakah vaihhlo laka kan fihlim a ngai a ni, a ti.

Pu Lal Thanzara nupui Pi Zohmingthangi Sailo pawhin Cure Club Foot Mizoram leh sawrkar inkarah kum 3 kaltaa MoU an lo ziah tawh thu leh kelek nei te tana hma an lo lak tawhna te a sawi a. Kelek hi a hun taka enkawl chuan a dam thei tih hria in hetiang vei an hria a nih chuan an pawl hian an tanpui thei tih hre tur leh a remchanna hmun apianga an pawl thil tum lo sawi darh turin kalkhawmte a sawm a ni.

AIKO aiawhin Board Member Pu R. Vanlalena’n thusawiin Hunthar Veng Local Council Chairman Pu Lalhmangaiha Renthlei in lawmthu sawiin he hun hi a khar a ni.

 

Non-Communicable Diseases (NCD) Awareness Campaign & Screening Camp ah hian doctor te, physiotherapist te, dietician leh beng enkawl thiam bikte kalin a thlawna inentirna hun an hawn bakah damdawi a thlawnin an sem bawk a ni.