Supply Minister Pu John Rotluangliana chuan nimin, September 12 khan a bial chhung a mi, Rawpuichhip khua a zirlai hlawhtlingte chawimawina hunah Education Department hmalakna hnuaia sikul tan hun leh ban hun sawn hma hlawkna sawiin "Zirlaite tan hunawl nilovin hunthawl lehkhazirna leh thiamna dang zirna hun", an neih tur thu a sawi a. "Hunawl leh hunthawl ngaihpawlh chi a ni lo", a ni a ti. Rawpuichhip khua a zirlai hlawhtling te chawimawina hun hi an khaw Branch YMA in a buatsaih a ni a, a senso tawh pawh an mahni tum chawp a nih thu tar lan a ni. Zirlai hlawhtling chawimawi tak te hian Bachelor Of Computer Application, Bachelor of Business Management leh Bachelor of Arts Degree te an nei thar a ni.

Supply Minister Pu John Rotluangliana chuan thangtharte'n rual u zawkte neih ve loh thil hlu tak an nei a, he an thil neih hlu tak chu, mahni inrintawkna leh zahlohtheihna a ni a. An thil neih hlut hi zirtirtu leh nu leh pa ten an peipun sak chuan India ram mai nilo, khawvel thlenga mi chungchuang tur hi tam tak Mizo thlai zingah an awm tawh thu a sawi a. Mizo fa, Zoram pawna awm te hian India ram leh International level thlengin Mizo hming an ti tha tawh a, zoram chhunga cheng Zofa ten kan entawn a ngai a ni a ti. UPSC leh MPSC ah hian hna tha a awm teh meuh a, heng hna tha tluk zet hi SSC leh Company hrang hrang ah te a awm tih hi chian a hun tawh a ni a ti a. Chhawr hleih theihlo graduate nih chu thil zah thlak a nih thu sawiin Sawrkar ah ringawt luh tumlova an zirna in thiamna a pek hmanga eizawn tumna rilru chu kan rama mithiam hna neilo te hian an put a ngai a ni a ti. Zirlaite chawimawina programme chu remchang a la in Minister chuan a enkawl Supply kaihhnawih thil pawimawh mipui te tanahriat tul a tihte a tarlang a. Rel kawng siam that a nih dawn avangin buhfai, intin fairel bel kaihhnawih thil, chu a chatlak mai thei ni te pawh in a lang a. Heng hun harsa lo awm thei pumpelh nan hian mutmu pawh tuah lovin Sawrkarin tan a la mek a. Sawrkar a zam lova, mipui pawh in sawrkar ah rinna nghat ngam hmalak a awlsam sawt tur thu a sawi a. Buhfai chatlak lova semtur leh lei tur, a awm theih nan Myanmar thleng pawh a dawr mek a nih thu a sawi a. An hmalakna te hi mipui hnuk khawih a nih avangin pawl ang emaw, mimal ang emaw leh Politics hmanga dodal chu thil tih chi a ni dawn lova, mipui in chung mite chu an ngaidam thei dawn lo a ni a ti. Tunhnai a Veng thenkhat chhunga an Local Council ten an area chhunga Zu zawrh khapna an puang ringawt chu MLTP Act hunlai thil leh MLPC dan hnuaiah chuan dan dodal zawnga chet lakna a nih daih zawk thu a sawi a. Dan hmanga din chu dan kalh a khawsak a thiang lo a ni a ti.

Rawpuichhip Zirlai hlawhtling chawimawina programme ah hian chawimawina thuziak leh thilpek YMA buatsaih chu graduate thar te hnenah Minister hian a hlan a. Lawmpuina sumfai engmaw zat chu Zirlaite leh RawpuiChhip YMA te a pe bawk a ni.