No.6321/2020-2021

Aizawl, the 22nd September 2020 : Vawiin khan Aizawl Art Gallery-ah Information & Public Relations Department leh Mizoram Art Development Society tangkawpte buatsaih Online Painting Competition ‘Covid-19 hripui in nun a nghawng dan’ tih thupui hmanga lem inziahsiak lawmman semna hun buatsaih a ni a. He hun hi I&PR Secretary Pu Sangdingliana, I&PR Director Pi Lallianpuii leh Deputy Director Pi K.Vanlalsangi ten an hmanpui a ni.

Pu Sangdingliana chuan visual arts, a bik takin lemziah lamah Department leh MADS thawhhona chuan rah tha tak a chhuah thu sawiin state dangte nen inkhaikhin pawhin thil tih kan nei tam hle niin a lang, a ti a. Sakhaw hrang hrang hunpui lo thleng mek leh thleng turah hripui a taidarh zel a hlauhawm avangin Prime Minister chuan tunkar maiah khan mipuite Covid-19 chungchanga inzirtirna tichak leh zual turin Jan Andolan Campaign a hawn thu a sawi a. Mizoram pawh kawng hrang hrangin hma kan lak a tul dawn a, he lemziah intihsiakna thupui ‘Covid-19 hripui in kan nun a nghawng dan’ tih pawh hi he Campaign tan thil tangkai tak a nih a rin thu a sawi bawk a ni.

Pi Lallianpuii chuan hripui lengin khawvel hmun tin a tihbuai avangin Sawrkar ruahmanna leh programme tam tak a khailak a, sum leh pai dinhmun a tlahniamin chhung tin a nghawng dan erawh a inan loh thu a sawi a. Lemziah intihsiakna thupui ‘Covid-19 in kan nun a nghawng dan leh min run dan’ chu ngaihnawm leh rilru khawih takin lemziaktuten an pho chhuak a, an kuthnu te chu a theuneu lo hle nia a hmuh thu a sawi. Heng lemziakte hian Covid-19 hlauhawmzia leh he natna lakah mitin kan fimkhur a tulzia a tarlang hneh hle tiin awareness programme-ah heng lemziak te hi pholan tha a tih thu a sawi bawk a ni.

He intihsiaknaah hian lemziak thiam mi 71 telin lawmman 1-na latu Liansangmuana, Lunglei Electric chuan cheng 30,000 leh certificate a dawng a; lawmman 2-na Lalramchuana Sailo, Aizawl Zarkawtin cheng 20,000 leh certificate; 3-na latu Lalhmingmawii, Aizawl College Vengin cheng 10,000 leh certificate a dawng a ni. A ti tha zual thlanchhuah mi 7 hnenah cheng 2000 leh Certificate hlan a ni bawk. Consolation Prize dawngtute chu - Jacob Lalmuanawma, Aizawl Chaltlang; Zoramchhana, Aizawl Dawrpui Vengthar; Lalremdika, Aizawl Zuangtui; Lalthlamuana Zote Aizawl Ramhlun Vengthar; L.H. Lalthlamuani, Aizawl Seventhday Tlang; K. Lalramchhana, Aizawl Muanna Veng leh Merari Vanlalvena Aizawl Electric Veng te an ni.

He hunah hian kar kaltaa Online Art Workshop buatsaiha Most Promising Artist atana thlan Lalthlamuana hnenah lawmman cheng 3000 leh certificate hlan a ni bawk.