No.6320/2020-2021

Vawiin khan Irrigation & Water Resources Department (IWRD) chuan vawiin khan ni hnih awh tur National Hydrology Project (NHP) hnuaia ‘Efficient irrigation and water management practices’ tih thupui hmanga training hawnna hun, an Department Committee Room-ah an hmang a. IWRD Minister Pu C.Lalrinsanga chu khuallian a ni.

Pu C.Lalrinsanga chuan IWRD-in anmahni department chhunga thawktute tan training pawimawh tak an buatsaih chu lawmawm a ti a. IWRD chu Mizoram ei leh bara a intodelh theihna tura fawng pawihmawh tak chelhtu an ni a, anmahni nena inngheng renga hna thawk - Agriculture, Horticulture, Fisheries te leh irrigation mamawh department dangte nen pheikhai rual takin, hlawk zawka ei leh bar kan thar theih dan tur ngaihtuah chungin, ram hmasawn nana theihtawp chhuaha tan la zel turin a fuih. Minister chuan IWRD in bung thar a kai tih sawiin Cabinet-in Mizoram Water Policy a pawm tawh tih leh hemi hnuaiah hian dan hrang hrang siam tur tam tak hmachhawp a ni, a ti a. State pawn atanga lakluh ngai lovin Mizoram chhung ngeia tharchhuah hmanga kan intodelh theih nana tan la tur te, ram neitu nih inhriaa an hna chanpual theuh chu Mizoram tan an thawk tih hre turin a fuih a ni.

Chief Engineer Er.Lalrotluanga chuan training neih chhan sawifiahin JICA nena Mizoram sawrkar thawhhonaah hmalakna leh bawhzui tur tam tak a awm a. Mizoram tana master plan an duan chhuah hnuaiah IWRD hman tur an siamte a taka hmang thei turin thiamna tihpun a ngai a, National Hydrology Project (NHP) hnuaiah pawh thawktute intuaihriam hi a thil tumte zinga pawimawh tak a nih avangin he training hi NHP hnuaiah rin luh a ni, a ti.

He ni hnih awh training-ah hian IWRD hnuaia technical staff-te an tel a. Anni hian loneitute hnenah training an pe chhawng leh dawn a ni. NHP hnuaiah IWRD hian training vawi hnih an buatsaih tawh a. Mizoram hi hmarchhak State te zingah NHP hnuaia tehna hrang hranga titha ber te zinga mi a ni.

Training hawnna programme hi IWRD Chief Engineer Er.Lalrotluanga’n a kaihruai a. SE (W&D) Er.Beizawzi T.Azyu chuan lawmthu sawiin hun hnung a khar a ni.