No.6319/2020-2021

Nimin chawhnu khan Divisional Horticulture Conference Hall, Lunglei ah HPC, Lunglei bultumin Horticulture Department chuan thlasik thlai chi hrang hrang chi 16 loneitu mi 200 te hnenah an sem chhuak

He hunah hian Pu Lawmawma Tochhawng, MLA,Vice chairman, High Powered Committee for Lunglei chu khuallian niin, Pu L.Lalhmingmawia Pachuau, MHS, DH0, Lunglei chuan inkhawm hi a kaihruai a ni. Pu V.Lalremsanga,HEO, DHO's Office Lunglei in Technical report a pe bawk a ni.

HPC Vice Chairman Pu Lawmawma Tochhawng chuan Loneitu thlai chi dawngtu te duhsakna chibai bukin, tun hma kan pi leh pute rilru put hmang ei leh bara intodelh tum tlatna rilru ang tunlai thangthar te rilru hmathlir a alo lang leh chu lawmawm a tih thu a sawi a. DHO leh staff te tanrual leh thawhpui na avanga hetiang hun kan hmang thei ta ani tih sawiin, Media lam ten a thu leh thlalak te nena hetiang ang loneitu te hun pawimawh an thehdarh thin chu a tangkai takzet a ni a ti. Thlai chi tiak thalo avanga harsatna awm thin chu tun tum thlai chi ah erawh company rintlak, Department a thawk ten ngun taka an thlan chhuah a nih avanga harsatna awm lo tura a beisei thu a sawi bawk. Mizoram Chief Minister leh Horticulture Minister ni bawk Pu Zoramthanga'n Covid hrileng avanga thlai a intodelh a ngaipawimawh avangte pawh in HPC Lunglei chuan heti lam hi a ngaipawimawh leh zual ta a ni a ti bawk.

Inkhawm kaihruaitu, Pu L.Lalhmingmawia Pachuau, DHO chuan Covid-19 hripui len chhoh tirh khan sorkarin mipuite ei leh bara kan harsat lutuk loh nan District tinah Vegetable supply chain a din a, kan District ah pawh DLTF te,VLTF te leh Horticulture Department tangkawpin he Vegetable supply chain hi a kalpui a ni. Hetih chhung hian khua 20 in khawpui chhung veng hrang hrang 25 hnenah thlai leh a rahte a supply nghe nghe a ni. Hetiang hun khirh tak kan tawn chhoh mek laiin mitin deuh thaw in intodelh pawimawhna kan hre tharin kan harh chhuak nasa hle a ni. Kan Vice Chairman, HPC, Lunglei hian lockdown hlimchhawn khan loneitute leh mipui te thlai lamah te pawh kan intodelh a pawimawh zia hriain Rs.3 lakhs man thlai chi hrang hrang 16 Horticulture Department nen tangkawp in kan lo semchhuak tawh a ni ati. Tun hunah pawh hian Thlasik thlai a hun taka chin a nih a, tharchhuah anih theihnan theihtawp chhuaha ruahmanna siam a ni, a ti. Lunglei DHO chuan thlai chi dawngtute chu thahnem ngaia hlawhtling ngei tura thawk turin a chah rualin Horticulture Staff te pawhin an vil reng tur thu a sawi a, hamthatna dawngtute chu, an thlai tharchhuah zat leh sum an lakluh zat te chhinchhiah thlap zel tur leh huan thlai thlalak te pawh neih ngei ngei a tul thu a sawi bawk a ni.

Tun tumah hian Lunglei District chhunga veng leh khaw hrang hrang atangin loneitu 200 thlanchhuah niin thlai chi hrang hrang 16 semchhuah tura ruahman a ni.Heng thlai chi te hi Company rintlak tak hnen atanga chah thlen a ni.

Pu P.C.Lalmalsawma, HDO chuan lawmthu sawiin hun a khar a ni.