No.7073/2020-2021 

Vawiin khan Information and Public Relations (I&PR) changtu Minister Pu Lalruatkima hovin I & PR Department a thawktuten I & PR Auditorium-ah Pathian hnena lawmthu sawina leh kumthar inhlanna hun an hmang.

Pu Lalruatkima chuan I & PR Department chuan Sawrkar thu leh hla puanzar leh thehdarh kawngah leh mipui sukthlek Sawrkar hriattira chumi mila Sawrkar inbuatsaih tura finchhuah kawngah te Department-in an mawhphurna tha takin an hlenchhuak nia a hriat thu a sawi a. COVID-19 hripui dona kawngah a hmatawnga awmin mawhphurna lian tak tak nei Department dangte nen thawhona tha tak an nei a.  Mipuiin Department an hmuh dan, an hriat dan leh an thlir dan te a danglam a, a bik takin hripui chungchanga Sawrkar thuchhuah an ngaihchanna leh rinna an nghah ngamzia a lang hle niin a sawi. Hei hian Department hlutna a pek bakah Sawrkar tan zahawmna a keng tel niin Information Minister chuan a sawi bawk.  

Minister chuan Department-a hnathawktu zawng zawngte inpekna, thawhrimna leh thawhhonaah lawmthu sawiin hripui laka mipui kan him tlan zel theih nan mipui zirtir leh hrilhhriat kawngah theihtawp chhuah zel turin a chah a. Pathian awmpuina leh hruaina changin Sawrkar ruahmanna te, Kohhran leh tlawmngai pawl hrang hrangten an tawiawm that avang leh Sawrkar thu leh hla leh tih tur leh tih lo tur te mipuiin an zawm that avang tein Mizoram chu India ram state zinga COVID-19 avanga boral tlem ber state a ni thei a,  kan zavaia thawhhona rah a ni tiin lawmthu a sawi a ni.

Pu Lalruatkima chuan Department hnathawktute chu Sawrkar chhiahhlawh leh mipuite rawngbawl tur an nih angin an hnathawh kawnga mipui tan harsatna aiin awlsamna siam sak tu, dawrtu te tana biak nuam leh midangte laka hawihawm thin turin a chah a. Department thawhhona, inpumkhatna leh inpawhna te tichak leh zual tura fuihin an laka mipui te beiseina hlenchhuak ngei turin a chah a ni.  

He huna thusawitu dang I & PR Director Pi Lallianpuii chuan an hnathawh kawnga tih dan tha leh chin dan tha te chu chhawm nung zel tur te, an hriatna ti zau zel a, Sawrkar thu leh hla vawnna kawnga rinawmna nei zel turin a chah a. Sawrkar chhiahhlawh tan mahni hnain a tawrh khawpa pawl leh kohhranah a rem lo tih hre thar leh turin a fuih a ni.

He programme hi Pu C. Lalnunkima, Joint Director, I & PR Department chuan kaihruaiin Pi Mina Zoliani, Deputy Director in hunserh leh inhlan tharna tawngtaina hun a hmang a ni.

Programme zawh hian Minister hian Department building bulah building thar Lianchhiari Run sak mek  a tlawh nghal a ni.