Mizoram sorkar I & PR Department chuan hun engemaw ti chen atang khan film tih hmasawnna kawng hrang hrangin a kalpui a. Film tih hmasawnna atan hian I & PR department hi sorkar chuan nodal department atan a hmang mek a ni.

Hetih lai hian rampuma film pholanna lian ber, ni 11 chhung awh, nimina tiak ta International Films Festival of India, Goa a neih ah I & PR department officer 2 Pi Lallianpuii MIS, Dy. Director leh Pu Pratap Chhetri MIS, IPRO te chuan sorkar laipui Ministry of Information & Broadcasting leh National Films Development Corporation te sawmna leh bultumin he hun hi an zuk chhim a. Festival chhunga programme hrang hrang Film Bazaar, Screening hrang hrang, Northeast Film Inauguration leh Film kaihhnawih programme dangte hmangin Mizoram tana seng luh tur thil tangkai tam tak an zuk zir a ni. Mizoram film siam tu ten hmanraw changkang leh tha zawk nena hralh tlak film an siam theihna turin nasa lehzuala tanlak ho a tul thu IFFI chhimtute hian an sawi a ni.

Kumin hi IFFI neih vawi 45 na niin 2006 atang khan Goa hi permanent venue atan hman a ni. Kumin hian he festival ah hian ram hrang hrang 79 atangin film tha 200 vel pholan a ni. Nikum atang khan IFFI ah hian hmarchhak film te chu category hran pa liau liaua dah niin Northeast Focus tiin hmarchhak film te hi pholan tan a ni.