Soil & Water Conservation Department-in Field Worker Level te tana thla thum awh training ‘3 Months Condensed Course Training for Field Worker Level – 2014’, kharna leh result hlanna programme S& WC Department meeting hall-a buatsaih chu vawiin khan Soil & Water Conservation Department enkawltu Minister Pu Lalrinmawia Ralte in a hmanpui.

Pu Lalrinmawia Ralte chuan tunlaiin khawvel boruak leh sik leh sa a inthlak danglam nasa a, hengte hi khawvel in a buaipui chho mek a, lei hang luangral leh ram ngaw chereu te venna kawngah te leh tuihna humhalhna kawngah te Soil & Water Conservation leh Environment & Forest Department te hi an pawimawh em em a, an mawh a lian hle a ni a tiin heng Department-te hi tunlai Department an nih thu a sawi a. Chuvangin ram leilung chhe zel venna leh tui hna kang zel venna kawnga Soil & Water Conservation Department chuan mawhphurna lian tak a nei a ni, a ti.

Minister hian training chhuak Field Worker te chu an thiamna leh hriatna zawng zawng ui miah lovin mipui hlan chhawnga zirtir tura chahin leilung leh tuihna siamthatna kawnga an mawhphurna lian tak chu theihtawp chhuah a ram leh mipui tan hlenchhuak turin a fuih a ni. Department tam tak ang bawkin Soil & Water Conservation Department-ah indaihlohna karah pawh hna tam tak a thawh theih a ni tih kan hriat theuh hi a pawimawh hle in ka hria a ni, a ti.

Pu Lalrinmawia Ralte hian training zo Field Worker mi 23 hnenah Certificate leh marksheet te a hlan nghal a ni.

He programme ah hian Secretary leh Director, Soil & Water Conservation Department Pu B. Lalhmingthanga pawhin thu a sawi a, programme hi Pu George Lalromawia, Joint Director chuan kaihruaiin Pu R. Zoengmawia, Co-ordinator atangin training chungchanga Report ngaihthlak a ni bawk.

Training a ti tha ber mi panga te chu – Lalthanpuia, SCFW, Mamit District; Lalbiakenga SCFW, Khawzawl District; PC Lalrinawmi SCFW, Lunglei District; Malsawmthangi, SCFW, Khawzawl District leh Lalthanfeli SCFW, Aizawl District te an ni.