I & PR Minister Pu Zodintluanga chuan vawiin chawhma khan I & PR department officer-te anmahni conference hall-ah meeting a neihpui a, Aizawl khaw pawna officer te pawh an tel tha hle.

 

 

Minister chuan he department hi sorkar leh mipui inkara thawktu, sorkar thu kal lam leh haw lam mipuite hnena puangzartu ber an nih avangin an hna hi a pawimawh a. An hnathawhna atana mamawh hrang hrangte pawh thuam chak an tul a ni a ti. Sorkar mipawimawh-te thu leh hla nitina an puanzar thin avang leh sorkar hmalakna hrang hrang thehdarhtu an nih avang hian an hnathawhah pawh sorkar neitu apiangte chu an lawm hle thin a. Chutih laiin sorkar eptu apiangin sorkar lamtang lutukah an ngai fo thin bawk. Hei hian an hnathawh that zia a pholang zawk a ni, a ti.

Vawiina meeting an neihah hian he department hmasawnna tura thil hrang hrang Technical tih changtlun pawimawhna te sawichhuah a ni a. Tunlai khawvel thiamna hmang tangkaia sorkar VIP te programme hrang hrang rang zawka TV leh chanchinbu lama tarlan dan tur kawngte sawiho a ni a. Sorkar department leh sorkar laipui enkawl society hrang hrangte atanga man chawia thu puanchhuah tur (advertisement) chungchang sawiin rualkhai leh zau zawka tih anih theih nan heng atana sum ruahmante hi I & PR department-ah chhun khawm vek dan a awm em tih te sawi ho a ni a. A tul anga bawhzui zel Minister ho hian an rel a ni.

He department in an nitin hnathawhna a an mamawh ngawih ngawih thin lirthei lama harsatna an neihte pawh sawihoin Minister chuan theih tawp chhuahpui a tum thu a sawi a. Sorkar-in lirthei kawlpha chin a siamte pawh he department tan hi chuan phalrai deuh dan a awm em tih te huamzau takin an sawiho a. Minister kaihza vengtu te tan bik chanchinthar tawifel ziak dan sawihopui pawh thil tul tak nia hriain he hun hi a remchan dan a zira ruahman pawh meeting chuan a rel bawk.

District hrang hranga IPRO Office tih chak leh an hmanraw mamawh ngaihtuahpui chu vawiin meeting-ah sawiho langsar ber pakhat a ni.