Mizoram chhunga sikserh (malaria) dona chi khat atan thosi kah runpui chu thla thar April atangin thlak leh tur a ni a. Hemi chungchanga zirhona leh hmalak dan tur tlangpui chu vawiin khan I & PR Conference Hall-ah District tina CMO leh mi pawimawh dangten an zir ho. Kumina thosi kah dan tur chu sorkar laipui ruahman angin kum danga tih ngai loh anga kalpui a ni dawn a. Medical Sub-Centre tin huamchhunga mi 1000 atanga mi 5 aia tlem Malaria kai awmna bialah te chuan thosi kah ve tur a ni dawn lova. Aizawl khawpui chhungah pawh kah ngai lo tura ngaih a ni. Hetianga kalphung thara thosi kah hi thlak tur a nih avangin mipuiten thil awmdan hrechiang tura zau zawk a inhrilhfiah pawh vawiin zirhonaah hian uar taka sawilan a ni.

He zirhona hun hi chawhnu lamah Health Minister Pu Lalrinliana Sailo chuan a hmanpui a, thu sawiin Minister chuan thosi kah dan kalphung thar hi mipui mimirin sorkar inthlak vangah an ruat palh thei ang tiin hei hi politics hawi zawnga sawi pawrh chi tur a ni lovang a ti. Kalphung thar ah hian survey report report chu innghahna bul ber anih dawn avangin thawktu zawng zawng a te ber atanga a lian berte chu an survey-ah report dik tak an la thiam tur a ni ang, a ti. Health deptt. chu mihringte nunna leh damna khawih annih avangin inthlahdah lova theih tawp chhuah turin a chah a, hun remchang hmasa berah huamzau zawka inhmuhkhawmna hun siama infuih thar tul a tih thu a sawilang bawk. Minister chuan sorkar laipui atangin sum tam tak haichhuah theih anih dan sawiin sum haichhuah tam ngawr ngawrah hian inel tur a ni lova a hmanna leh chung sumte atanga kan hnathawh rah (outcome) ah kan in en zawk tur a ni ang, a ti. Health chungchangah Minister chuan tih dam aiin inven a pawimawh zawk tih hi kan hre reng tur a ni ang Pu Lalrinliana Sailo chuan a ti bawk.