Vawiin chawhma dar 11.00 khan Gpvt. Aizawl West College chuan Chanmari YMA Hall-ah kum 2011 zirna kum thara an college-a zirlai tharte pualin inkhawm an buatsaih a; Pu Zodintluanga, I&PR Minister chuan he hun hi a hmanpui a ni.

Pu Zodintluanga chuan, "Khawvel hi thalaite kutah a awm cho mek a, chuvang chuan kawng engkimah thangtharte hian remchanna leh hamthatna kan ngah chho zel a. Khawvel finna leh thiamnate man leh hmang zung zung thei dinhmun a kan din tak avangin zirna lamah pawh a titha duh leh titha duh lo te kan inthliar mek a ni" a ti. Zirlaite chu kum reilote lehkha an zir chhunga an zirlai ngai pawimawh ber reng tura chahin, "Kohhran leh pawl hrang hrangah kan inhmang hi a tha a; nimahsela, kan zirna hi kan nuna pawimawh ber a nih rih si avangin inhman dan chin tawk kan hriat a tul a, zirlai pawl hruaitu kan nih pawhin zirlaite hamthatna chungchang chauh kan buaipui thiam a tul. College zirlai kan nih tawh chuan keimahni mamawh zualpui tal hi chu nu leh pate pur buai lova thianghlim taka thawhchhuah kan tum ve pawh a ngai a ni" I&PR Minister chuan a ti.

Govt. Aizawl West College hi mi thahnemngaite hmalaknain 2.3.1990 khan a lo ding tan a; sawrkar hriatpuina leh University Grants Commission hriatpuinate dawng chho zelin, 7.10.2007 khan provincialised a lo ni ta a ni. India rama college-te that dan endiktu NAAC chuan Govt. Aizawl West College hi C+ dinhmun a pe a ni. Tunah hian subject hrang pariat a zir theih a; lecturer 36  leh thawktu dang mi 18 awmin, kum 2011-ah hian zirlai 574 a nei mek a ni.

Vawiin-a freshers' social-ah hian college annual magazine 2011 chu Pu Zodintluanga hian a tlangzarh a; zirlaite leh lecturer-ten hun hlimawm tak an hmang ho a ni.