Vawiin chhun Dar 11:00 khan I&PR Secretary Pi Rosangpuii chuan Tanpuia 6th Solo Exhibition of Paintings, Aizawl Art Gallery, MUP Buildinga neih chu a duh a piang tlawh theih turin a hawng.

Pi Rosangpuii chuan 'Painting hi thil ngaihhlutawm tak, mi zawng zawngin kan tihve theih loh a ni a. Miin a ngaihtuahna ril leh thuk tak, suangtuahna mitthla ringawt hmanga ngawi renga midangte hnena thuchah Bung leh Chang tamtak neia hrilhna a ni a. Lemiziak chu a tawng thei lo a, a thawm a hriat theih bawk lo va. Mahse, ring takin, fiah takin thu min hrilh si a ni. Painting hmang hian eng anga khawvel ram kilkhawr leh hla pawh a zin theih a, englai maha kan la hriat ngai loh mite nen inawmna hmanruaah kan hmang thei bawk. Thlalak hmuhnawm tak ai pawhin Painting hian mi rilru a hneh thin a, a chhan chu a ziaktu in a thinlung laimu, suangtuahna laimu a zeh tel tlat vang a ni. I&PR Department chuan Painting lam tih hmasawn nan phur takin hna kan thawk zel dawn a ni. Painting hi Kan hnam rohlu leh nihphung te chawilarna tur kawng pawimawh tak a nih tlat avangin theih tawp kan chhuah zel ang' tiin Tanpuia 6th Solo Exhibition of Painting hawnnaah hian a sawi a ni.

Solo Exhibition of Painting buatsaihtu Pu Tanpuia pawh in thu sawiin, a vawi 6-na a tana Exhibition a ma kut chhuak hlanga a buatsaih thei chu lawmawm a tih thu te, tun ang Programme ti hlawhlting tura thawhrim a tulzia te sawiin, State danga artist te thlen chin umpha tura Mizo artist te tanrual leh thawhrim a pawimawhzia a tarlang bawk a ni.

Tanpuia 6th Solo Exhibition of Painting hawnna inkhawm hi Pu HK. Jerry Ramliana, Vice President, Mizoram Art Development Soceity chuan a kaihruai a. I&PR leh Mizoram Art Development Society in Artist te hmasawnna tur a tana thawhhona tha tak an nei chu lawmawm a tih thu te, Sawrkar in an hmalakna atana kum tin budget-a sum a dah thin chu an tangkai pui thu te, hei hian lemziak mite an kal zelna a tana kawng a hawnsak thu a tarlang in, Painting Exhibition tlawh tute chu rilru inhawng taka tlawh turin a sawm bawk a ni.

Tun tuma Tanpuia 6th Solo Exhibition of Painting ah hian lemziak 55 Water Colour Medium hmanga ziak pho chhuah a ni a, heng lemziak pho chhuahte hian thuchah pawimawh tak tak a neih zingah- 'kan chenna khawvel chhe zel siam tha tur leh khawvel tha zawk din turin mawh kan phur a ni' tih entir nana Environment humhalh pawimawhna lantir tura lemziakte chuan Exhibition tlawhtute mit a la hle tura ngaih a ni. Painting Exhibition hian May 2, Inrinni thleng a awh ang a, nitin zing Dar 10 atanga zan dar 8 thleng a tlawh theih dawn a ni.

Tanpuia 6th Solo Exhibition hawnna hi I&PR Director Pu Jim K. Chozah leh Officer thenkhatin an tawiawm bawk a ni.