2765/2025-2026
Aizawl, the 22nd December 2025 : Mizoram Film industry tih hmasawn nan leh Film industry lama tui mite talent phochhuah a nih theih nan I&PR Directorate bultumin Mizoram Film development Committee chuan Short Film Making Competition a buatsaih dawn.
He competition atan hian Theme thlan bik a awm lo a, mahni duh zawng, eng thupui pawh hman theih a ni ang a. Film tawi, minute 10 atanga minute 15 a sei, Full HD quality, 16:9 Horizontal a siam tur a ni ang a. Mimal leh pawl ang pawhin entry a thehluh theih ang. Equipment chu eng chi pawh hman phal a ni a. Film lama tui mite thiamna phochhuahna tur a nih angin Artificial Intelligence (AI) hman phal a ni lo a. Thlirtute tana en leh ngaihthlaka mawi lo, saruak, inkutthlakna, sakhua leh chi bil inhuat theihna lam hawi script leh visuals chu pawm a ni lo ang. Mi film siam tawh sa emaw copyrighted visuals leh sound hman phal a ni lovang. English subtitle telh bawk tur a ni.
Lawmman 1 na hian cheng nuai 2.5 a keng tel dawn a; 2 na in cheng nuai 1.25 a keng tel anga; , 3 na in cheng sing 7 keng tel bawkin consolation prize cheng sing 3, mi 5 tan a awm dawn bawk a ni.
January ni 31, 2026 ral hma ngeiin email diprmizoram@gmail.com ah emaw phone number(Google link in) 9774634454 ah hian film siamte hi a thehluh theih a. Pendrive hmangin Directorate of I & PR ah a thehluh theih bawk.
