2766/2025-2026

Lawngtlai, 23rd December 2025: Vawiin chawhma dar 11: 00 AM khan DC Conference Hall-ah 'Good Governance Week' hmanna neih a ni a. Dr. Lorrain Lalpekliana Chinzah, Adviser to Chief Minister (H&FW,A&FW) leh Lawngtlai East bialtu MLA nibawk chuan hmanpuiin, Pu Donny Lalruatsanga District Bawrhsap chuan hun a kaihruai.

Dr. Lorrain Lalpekliana Chinzah chuan kalkhawmte hnen a lawmthu sawina a nei hmasa a. Rorelna thain ram leh mipuite tan hmasawnna a thlen thin angin, rorelna tha tak nei tura hmalak a tul hle a ni, a ti a. Rorelna tha chuan sawrkar nghet tak dinin, mipuiin sawrkarah rinna nghatin lungawina an hmu bawk thin a, chutiang rorelna tha siam tur chuan mawhphurhna neiten theihtawp an chhuah a tul hle a ti. Ei leh bar, sumdawnna leh thil danga hmasawnna thleng turin rorelna tha a awm a tul a, sawrkar tha tak din turin theihtawp i chhuah ang u tiin a sawm a. Eirukna hian hmasawnna a dal thin a, ram chang kang tehna pawh eirukna a tam em tih a ni fo tih tarlangin, ramin hma a sawnna tura eirukna lama fihlim turin sawrkar hnathawkte a chah a ni.

Adviser to Chief Minister chuan Democracy ban pathum pawimawh tak - Executive, Legislative leh Judiciary- te inkarah thawhhona tha tak a awm loh chuan sawrkar tha din a harsa tih sawiin, thawhhona tha tak awm tura tan la thar turin a fuih a. MLA chuan lang tlang sawrkar din turin NGO leh mipuite pawhin tih tur an nei ve tih tarlangin, sawrkar hmalakna, sum hmanna leh hnathawhah dik tawk lo a em em tihte an ngaihvenin, an enfiahpui fo a tul hle a ti. MLA chuan sawrkar tha tak din turin sawrkar hnathawk, Politician, NGO, Kohhran leh vantlang mipuite inkarah thawhhona tha tak a awm a tul hle tiin, thawhhona tha tak awm tura theihtawp chhuahho turin a sawm a ni. Dr. Lorrain Lalpekliana Chinzah chuan hunpui lai a nih angin Krismas leh kum thar tha tak a hmang turin kalkhawmte leh Lawngtlai mipuite duhsakna a hlan nghal bawk.

Pu Lalrindika, SDC, chuan DC Office-a Good Governance - kalpui a nih dawn tlangpui sawifiahna a nei a. Pi Lalkhawngaihdawngi Chinzah,DPO, NHM, CMO Office- hnen atangin Good Governance- an kalpui dan tlangpui ngaihthlakna neih a ni bawk a ni.

Vawiin hun hmannaah hian Pu Donny Lalruatsanga chuan kalkhawmte lawmna thu sawiin, Mizoram sawrkar leh LADC - a Department hotute bakah NGO - aiawhte an tel kim tha hle a, Pu H. Zonunmawia, PD (DRDO) chuan lawmthu sawina neiin hun a khar.

Good Governance Week- hi  December Ni 19 atanga Ni  25 inkar chhung hman tur a ni a, kumin thupui atan hian "Prashasan Gaon Ki Ore” - Citizen-centric Governance and doorstep redressal of public grievances (Mipui thlurbing rorelna leh an  lungawilohna an chenna hmun ngeia chinfel ) tih hman a ni.