2767/2025-2026

Dated Aizawl, the 23rd December, 2025: Vawiin khan Tourism Department leh Mark Events-te tangkawp buatsaihin Chanmari atanga Lammual thleng Christmas Parade neih a ni a. Pu Lalduhoma, Chief Minister leh Pu Lalnghinglova Hmar, Minister, Tourism Department-te chuan he Parade hi an ho a ni.

Mipui thahnem tak fuan khawmna Christmas Parade-ah hian Venghnuai Kohhran Pavalai Pawlte chuan rimawi tumin, Mizoram Cosplay Organisation-te’n thuam mak mawi leh danglam tak takte an pholang a. Art & Culture Department hnuaia Institute of Music & Fine Arts atanga zirchhuakte’n Mizo thuam chi hrang hrang entir bawkin, Mizoram Down Syndrome Association-te pawh he Parade-ah hian an tel a ni.

Chief Minister Pu Lalduhoma-te chhungkua chuan Zarkawt kawn atangin Christmas Parade hi telpuiin hma an hruai a. Tourism Minister Pu Lalnghinglova Hmar leh department hotute pawh an tel a. No Vehicle Zone chhimtu mipuite chibai buk phei zelin, Lammualah an lutkhawm a. Christmas Carol Concert leh Winter Festival 2025 kharna hun an hmang nghal a. Winter Fest kharna inkhawmah hian Chief Minister Pu Lalduhoma chuan mipuite hnena chibai bukna thu tawi a sawi a ni.

Vawiin Christmas Parade-ah hian Best Costume Award siam a ni a, lawmman hian Rs. 5000/- a keng tel a.

Mari & Joseph cosplay-tu Lalrinnunga leh Rebek Lalremruati-te'n an dawng a ni.