Indian Administrative Service (IAS) 2017 batch Probationer zinga mi 23 te chuan Mizoram rawn tlawhin, Chief Minister Pu Lal Thanhawla chu a chenna Bungalow ah vawiin chawhnu khan an hmu.

Chief Minister chuan IAS officer rualte chu ram rorelna fawng chelhtu pawimawh tak tak vek an nih dawn avangin khawi hmunah pawh post se an awmna state tan thahnemngai taka thawk zel tura chah in, hleih nei lova ro an rel zel theih nan mipui rawngbawl na thinlung dik tak pu tura a duh thu a hrilh. IAS Officer training nei mekte hi Chief Minister chuan Mizoram leh Mizote chanchin tlangpui a hrilh a. Mizorama hmasawnna hna kalpui tawh leh thawh mek te sawipuiin, a bik takin thalai te tana eizawnna kawng tha zawng hawng tura zirna lamah te, infiamna lamah leh thiam thil hrang hrang chher puitlin sak tura hmalakna te a hrilh a. Mizoram leh India hmarchhak state te chu India ram state dangte aia danglamna a neih avangin hmasawnna hna thawh naah pawh an post na state an hriat chian a tul thu a sawipui.

IAS Officer te chuan Chief Minister chungah lawmthu sawiin, Mizoram chu nuam an tih thu leh, a mi chengten khual thlen thiam an tih thu a sawi.

IAS 2017 Batch Probationer zinga Mizoram lo kal te hi an vaiin mi 23 an ni a. AGMUT Cadre mi 6, Assam-Meghalaya Cadre mi 6, Manipur Cadre mi 4, Nagaland Cadre mi 4, Sikkim Cadre 1 leh Tripura Cadre mi 2 an ni. Nimin khan Mizoram lo thlengin, zanin hian IAS Officer Mizoramah hna chelh mekte nen inkawmna hun an nei leh ang a, naktukah an haw dawn a ni.