Vawiin khan Governor Pu Kummanam Rajasekharan chuan Mizorama medical college hmasa ber, Mizoram Institute of Medical Education and Research (MIMER) leh Zokhua, Falkawna awm te chu a tlawh a ni.

Governor chuan MIMER chu tlawh hmasa in, MIMER Director Dr. Lallukhum Fimate, Health leh Medical Education Director Dr. T. Lalhmangaihi leh a thawktu dangten an lo dawngsawng a. Hospital leh medical college hmunhma te fangkualin, damlo thenkhat te a kawm a ni.

MIMER-a thawktute nena inkawm ho naah hian, Pu Kummanam Rajasekharan chuan Governor MIMER tlawhtu hmasa ber a ni chu lawmawm a tih thu a sawi a, Mizoram tana hlawhtlinna lian tak a ni tiin, kan ram chhuanvawr a ni, a ti a. Governor chuan college bultumtu an nih angin, thangthar lo la awm zel turten an thawhrimnate chu an chhinchhiah reng tur thu a sawi a ni. Khawpuia damdawiin dangte nen tehkhin in, MIMER chu a boruak thianghlimin a hmun a fianrial a ti a, damlote pawhin hei hi an thatpui dawn a ni, a ti. Natna hmuh chhuah thar laka mipui an him theih nan , research a ngaihpawimawh thu a sawi a. Hriselna lama inzirtirna  pawh uar turin a chah a ni. India rama college hmingthang berte zing ami a nih theih nan theihtawp chhuahpui a tum thu a sawi bawk a ni.

Dr. L. Fimate chuan State sawrkar inpekna leh tanpuina avanga Referral Hospital chu medical college-a hlankai a nih thu a sawi a. Sawrkar laipuia Ministry of Health and Family Welfare atanga Letter of Permission (LoP) an hmuh tawh thu leh Medical Council of India (MCI) pawhin medical college bultan tura a lungawi thu a sawi a ni. MIMER chu medical institute hmingthang dangte ang bawka society hnuaia autonomous body a ni dawn a ni, a ti bawk.

Governor hian MIMER a tlawh zawh hnuin Falkawna Zokhua chu a tlawh leh a. Hetah hian Art and Culture department Deputy Director Pu Lalchuailova hovin an lo dawngsawng a. Mizo In hrang hrang enkualpui a nih hnuah ama pualin Cheraw leh Solakia te entir an ni.