Vawiin khan Chanmari West Sporting Club buatsaih Hmingtea Cup, Chanmari West Local Football Tournament final khelh a ni a. Aizawl North III bialtu MLA, I&PR Minister Pu Lal Thanzara’n he hun hi a hmanpui. 

Pu Lal Thanzara chuan Aizawl North III Constituency chhunga veng hrang hrangte football ah an sang hle a, Mizoram Premier League a tel pha an awm nual a, sports discipline hrang hrangah hma an sawn avangin bialtu a nih anga lawmawm a tih thu a sawi. Sawrkarin infiammi te tana ruhrel tha tak tak a din te chu a chhawr tangkaitu ni tura fuihin infiamna hi ruihlo laka thalaite  an fihlim theihna tur hmanraw tangkai a nih a beisei thu a sawi a. Chanmari West veng chhung mipuite tan football tournament buatsaih a nih theih nana mimal sum thawh tu Pu H.Lalchungnunga te chhungkaw chungah lawmthu a sawi bawk a ni.

Hmingtea Cup hi Chanmari West Sporting Club Executive Member a nih laia chatuan ram pan ta Tv. H. Vanlalhmingthansanga hriatreng nana buatsaih a ni a. Sporting Club nen inremna siamin kum thum chhung neih tura ruahman a ni. Tun tumah hian Chanmari West Vengchhung atangin club paruk an chhuak a. Pakhatna lawmman hi cheng 10,000 leh trophy a ni. Vawiin hian MHIP leh MUP team ten exhibition match an khel bawk.