813/2026-2027

Kolasib, dated 3rd June, 2026: Kolasiba cham mek Shri Dr. L. Murugan, Union Minister of State for Information & Broadcasting and Parliamentary Affairs chuan vawiin chawhma khan Kolasib khaw chhunga Sawrkar hmalakna thenkhat leh zirna in te a tlawh a. Pu H.Dolianbuaia, Deputy Commissioner, Pu Lalrinpuia Varte, SP, Pu Vanlalchhana, District Education Officer, Pi C.Lalremruati, DCPO ten an tawiawm a ni.

Union Minister of State hian Regional Sports Training Centre, Saidan a tlawh a, RSTC zirlaiten football match lo entirin, he Centre tih changtlun lehzualna tura hmalakna tul zualte an sawipui a ni.

Union Minister chuan PM Government Model primary school-I, Kolasib, PM School for Rising India a tlawh a. Zirlaite nen inkawmna hun hmangin India ram chu kum 2047-ah chuan ram hmasawnna tluantling nei turin a inbuatsaih mek thu sawiin, chu inbuatsaihna tihlawhtling tur chuan zirlaite chu thawktu pawimawh tak an nih thu a sawi.

Union Minister of State Shri Dr. L.Murugan chuan Diakkawn High School, Kolasib a tlawhna ah NCC parade contingent ten chibai lo bukin, zirlaiten Mizo hnam lam an lo entir a. New Education Policy zulzuia eizawnna tling thiam thil (Vocational course) naupangte an zirtir dan a taka entir a ni a. Zirtirtu leh zirlaite nen inkawmhona hun an hmang bawk. Audrene Scism Children's Home, Khuangpuilam tlawh lehin thawktute chuan naupang awm mekte dinhmun leh enkawlna an pek dante an lo sawipui a. Minister hian Thingdawl ICDS Project hnuaia kalpui, Kolasib Vengthara Anganwadi Centre a tlawh a, thawktute bakah naupang leh nu leh pa lo kalte nen inkawmna hun an hmang bawk a ni.

Union Minister of State Shri Dr. L. Murugan chuan Kolasib a chhuahsan hma hian ICAR, Kolasib hmalakna a kalpui tur 'Khed Bachao Abhiyan' a tlangzarh a. Fertilizer tel loa thlai hrisel taka enkawl dan te, kuthnathawktute tana thiamna tangkai tam thei ang ber pek te, huan/lo, ram siam nana lei hrisel siam dan inzirtirte, hemi hnuaiah hian kalpui a ni dawn a ni.

Shri Dr. L. Murugan hian ICAR conference Hall-ah ICAR,  KVK, Kolasiba thawktute leh loneitute nen inkawmna hun hmangin, thlai hrisel tharchhuah pawimawhzia leh kuthnathawktuten thlai hrisel leh thahnem zawk an thar chhuah theih nan tunlai thiamna thar ber pek zel a pawimawh thu a sawi a. ICAR, Kolasiba mithiamte buatsaih 'Weather based Agro - Advisories for Climate resilient Farming in Mizoram, A Compilation of Success Stories' tih lehkhabu chu a tlangzarh nghal bawk a ni.