Vawiin chawhnu khan Chief Secretary Pu Lalmalsawma hovin Aijal Club Conference Hall-ah Shyama Prasad Mukherjee Rurban Mission (SPMRM) hnuaia State Level Empowered Committee (SLEC) an thukhawm.

Meeting-ah hian SPMRM hnuaia Integrated Cluster Action Plan (ICAP) chungchang sawiho a ni a. Rural Development (RD) Under Secretary Pu Paul L.Khuma’n powerpoint hmangin ICAP kalpui dan tur Finalisation of Integrated Cluster Action Plan a sawifiah hnuah sawihona hun hman zui nghal a ni.

ICAP in a tum ber chu thingtlang khaw hrang hrang, inhnaih te te awm te, a hlawm (cluster)-a lakhawmin an mamawhte zirchian hnuah a changtlung thei ang bera chei that tum a ni a. Sawrkar laipui hmalakna ICAP atan hian India ram pumah khaw 300 thlanchhuah tur a ni a, a thawhkhatna atan khaw 100 thlan chhuah phawt tur niin Mizoramah chuan Aibawk RD Block thlan a ni a. Aibawk cluster hian Aibawk RD Block chhunga khaw sawmpakhat - Melriat, Falkawn, Muallungthu, Kelsih, Aibawk, Sateek, Phulpui, Maubuang, Thiak, Sumsuih leh Tachhip a huam a ni.

ICAP buaipui tur hian Catalyst Solutions, Chaltlang thlan an ni a. Aibawk Rurban Cluster-a khaw sawmpakhatte hmasawnna tur mamawh hrang hrang zirchianna neih a nih hnuah an khaw mamawh a zir zelin SPMRM hi kalpui tur a ni. Sawrkar department hrang hrangte’n anmahni puala scheme a hranga an thawh thin chu heng khua bikah hian kaikawpin hmasawnna hna an thawk ang a. Department scheme kaihkawp (convergence) hmanga hmalakte tihlawhtling turin sum indaihlohna a awm a nih chuan Critical Gap Funding hmanga hnawh khah tur a ni. Critical Gap Funding atanga sum hmuh theih zat hi project pumpui senso tur ruahman (project cost) atanga za zela sawmthum emaw a aia hniam tur a ni a. Mizoramah chuan project cost atanga chhuta 30% emaw cheng maktaduai 15 chu sanction awm thei zat a ni.

He meeting-ah hian SLEC member te leh Department hrang hrang atanga Nodal Officer ruatte bakah SPMRM nodal department an nih angin Rural Development Department officer engemawzat an tel.