Vawiin khan Planning Minister Pu Lalsawta chuan Mizoram Remote Sensing Application Centre (MIRSAC) in a buatsaih, Mizoram Infrastructure & Monitoring System (MIIMS) Atlas chu Mizoramin hmasawnna tura ruahmanna tha zawk a neih theih nan Secretariat Conference Hall-ah a tlangzarh.
Thusawiin Pu Lalsawta chuan vansang lam thiamna (Space Technology) hmang tangkaia, hmasawnna ruhrel (infrastructure) map leh System buatsaih a ni chu lawmawm a tih thu a sawi a. He Atlas-ah hian Mizoram khawtina hmasawnna ruhrel an neih dan te tarlan niin, Sorkar Department ten mahni thut hmunah awlsam takin hmun hrang hranga an Department kaihhnawih hmasawnna ruhrel an neih te, a thalo lai leh tlakchham lai te chiang takin a hriat theih dawn avangin Department lamin tangkai taka an hman a duh thu a sawi a ni.
New Economic Development Policy (NEDP) chungchang sawi telin Minister Pu Lalsawta chuan ram hmasawnna atan kan mithiamte leh mi neinung zawk ten an thiamna leh an hausaknate chu agriculture, horticulture, vety, industries leh adang te kan kuthnathawktute tihhmasawn turin 'investment' siam a, tanpuina pekna satliah nilovin, tang te tanpuina a nih zawk thu a sawi a. Sorkar chu engkimah inrawlh vek lovin, mimal leh pawlin an lei phak lo chin thildang, heng - khawl lian te, inkalpawhna, kawlphetha, tui supply, hriselna lama inenkawlna leh thildang te chu Sorkar-in a theih ang tawkin leh mipui mamawh ang zelin a ngaihtuah ang a. Hemi atan hian mipui pawhin kan ngaihdam kan her danglam thiam a, taimak leh ram hmangaihna nena thahnemngai taka kan thawh a pawimawh tur thu a sawi bawk.
Vawiin MIIMS Atlas leh System tlangzarhna hun hi Dr. C.Vanlalramsanga, Secretary, Planning chuan kaihruaiin, nasa taka MIRSAC-a thawkte an thawhchhuah hi department-ten hmasawnna tur an ruahman hunah tangkai taka an hman ngei a duh thu a sawi a. Dr. R.K.Lallianthanga, Chief Scientific Officer & Member Secretary, MIRSAC chuan MIIMS project kalpui a nih dan sawifiahin, Pu C.Vanlalengkima, Scientist, MIRSAC chuan he Mizoram Infrastructure Information & Monitoring System (MIIMS) hman tangkai dan tur hi a entir a ni.
MIIMS siam hna hi kum 2013 khan NEC atanga sum hmuh hmanga thawh tan a ni a. Mizoram khaw tinin hmasawnna ruhrel (infrastructure) an neih dan he Atlas-ah hian tar lan a nih bakah an awmna hmun dik takah Map buatsaih a ni a. He MIIMS project-ah hian Infrastucture mai bakah chipchiar zawkin a kaihhnawih dangte pawh dah luh belh theih zel a ni dawn a. Tunah hian MIRSAC chuan Remote Sensing leh GIS thiamna hmangin Mizoram Sorkar hnuaia Department hrang hrangte mamawh leh Central-a Department of Space nen project chi hrang hrang an kalpui mek a. Remote Sensing leh GIS thiamna hmanga hnathawh tur nei Department-te tan biak rawn theih an ni bawk. Atlas-ah hian district tina khaw hrang hrang te hi an hming bul ang zelin (alphabetical order)-in a indawta dah an ni a. He system hi Sorkar Department ten awlsam zawka an hawn (access) theih online-in browser hrang hrang hmanga luh theih turin buatsaih mek a ni a. A system-ah hian a kaihhnawih tul dang (attributes) dah belh theih zel a ni bawk.
Vawiin Atlas tlangzarhna hunah hian Department hrang hrang aiawhte leh MIRSAC Scientist thahnem tak an tel a. Department hrang hrang aiawh a lo kal te nen sawihona hun hman niin, he Atlas hi an hman tangkai turin a thlawna pek an ni bawk.
